Amosando publicacións coa etiqueta 2 de abril. Amosar todas as publicacións
Amosando publicacións coa etiqueta 2 de abril. Amosar todas as publicacións

domingo, 2 de abril de 2023

2 de abril: Día Internacional da Concienciación sobre o Autismo #chamémolopoloseunome

Se premes nesta imaxe da campaña deste ano, accedes ao álbum completo das actividades realizadas ao longo da semana para a Concienciación Sobre o Autismo #chamémolopoloseunome.


Grazas ao Departamento de Orientación, ao longo da última semana de marzo realizamos un montón de actividades para tomar conciencia sobre o autismo, para falar sobre esta condición sen tabúes, desde un enfoque positivo e coa intención de lograr avanzar cara a construción dunha sociedade máis inclusiva para todas as persoas. 

Baixo o lema deste ano #chamémolopoloseunome, preténdese desterrar falsos mitos e ideas erradas sobre o autismo e dar a coñecer a especificidade e a valía das persoas con TEA, impulsando deste modo o compromiso de toda a cidadanía nesta tarefa. Podedes ler aquí o MANIFESTO da Confederación de Autismo España.

Comezamos a semana visitando a exposición sobre o autismo que prepararon desde o Departamento de Orientación, facendo unha lectura reflexiva sobre a información dos carteis da exposición, apoiada a través de pictogramas para facelos máis accesibles.



Tamén realizamos uns obradoiros de sensibilización sobre o autismo de 3º a 6º de Primaria, grazas á visita de dúas profesionais de ASPANAES, Adriana (logopeda) e Inés (psicóloga), na que puideron reflexionar sobre o que xa coñecen ou quererían saber sobre o autismo.

Para tentar entender máis aos nenos e nenas con TEA, realizamos varias actividades como unha dinámica relacionada con distintas formas de comunicarse a través da expresión escrita ou o visionado dunha curtometraxe moi interesante que nos ensinou a entender un pouco máis como perciben o mundo as persoas con TEA e como con vontade e paciencia podemos entendernos e comunicarnos.



Para os máis peques do cole traballamos sobre o conto "Por cuatro esquinitas de nada", un conto de Jêrome Ruillier publicado pola editorial Juventud. Bibi contóunolo de marabilla, xa que ao tempo que o contaba, ía introducindo aos "redondiños" na casa grande e démonos conta de como puido conseguiu entrar "cadradiño" na casa grande.
Con ela aprendimos que todos temos cabida no mundo, e que ás persoas non as podemos cambiar, mais si podemos facer que o mundo sexa máis accesible para todos e todas.




E despois do contacontos elaboramos eses corazóns con catro pezas dun quebracabezas, que simbolizan o feito de que cada quen ten o seu lugar no mundo e que todos e todas somos igualmente valiosos.

O grupo dos Rebuldeir@s traballaron co conto "TEA", de Alejandra González, editado por Pintacola Ediciones, que ofrece unha experiencia inmersiva que nos fará empatizar coas persoas que teñen TEA. Grazas ás gafas vermellas e azuis, poden vivenciar unha dobre experiencia sobre o mesmo relato, coñecer as principais alteracións que presentan as persoas con autismo e obterán as claves que facilitan a presencia, participación e aprendizaxe destes nenos e nenas nas aulas, no recreo, no parque... xa que todos eles poden facer o mesmo que os seus compañeiros se contan cos apoios e axustes do seu entorno precisos.




Porque tomando conciencia sobre el autismo, contribuímos a facer  un mundo mellor, máis resilente e inclusivo no que todos e todas temos moito que aportar.

#chamémolopoloseunome

2 de abril: Día Internacional da Concienciación sobre o Autismo.

mércores, 6 de abril de 2011

AVÓS NA BIBLIO: Isidro Fraguela

Para commemorar o 2 de abril, entre outras actividades que poidestes ver estes días, invitamos aos avós e avoas a vir á nosa biblio para contarnos cousas sobre a súa vida. Nós, no colexio traballamos o libro de Xoán Farias, "Galego. Á beira do mar", onde a relación entre o Rapaciño e o Pencas (Avó e neto) xoga un papel importante. A partir de aquí quixemos abrir as portas para que as avoas e os avós puidesen ser os protagonistas doutras historias de verdade. As súas propias.
Seguro que nas casas escoitamos moitos relatos dos nosos maiores, de cando eran pequenos, de como xogaban, en que pasaban o tempo, como facían para poder estudar, que comodidades tiñan. Uns máis, outros menos. Isidro aceptou a nosa invitación e preparou unha presentación de imaxes que serviron para completar canto contou. Falounos da súa orixe humilde e de canto tivo que esforzarse para chegar a onde chegou. Transmitíunos a todos e todas, pequenos e grandes tamén, que na vida hai que loitar polo que un cre e hai que esforzarse moitísimo para conseguir aquilo que quere. O de Isidro é un exemplo real e estamos moi agradecidos por querer compartir con nós unha parte importante das súas vivencias.




¡GRAZAS E ATA CANDO QUEIRAS VOLVER!