Amosando publicacións coa etiqueta Voluntariado de lectura 22-23. Amosar todas as publicacións
Amosando publicacións coa etiqueta Voluntariado de lectura 22-23. Amosar todas as publicacións

xoves, 15 de xuño de 2023

Un premio para o noso Equipo Biblio

Un premio para o noso Equipo Biblio!!!
Preme nesta imaxe para acceder ao álbum completo.

Xa sabedes que este curso o noso Equipo Biblio foi premiado polo seu compromiso co Voluntariado de Lectura ao longo do curso. 
Mais non só polo seu esforzo, xa que tamén se tivo en conta para a concesión deste premio a actividade das familias colaboradoras - Manel Dopico, Óscar Fojo, Antón Cortizas, Irati Urizarbarrena, e moitas outras a través da ANPA - e a colaboración da Biblioteca co Departamento de Orientación para a escola de familias e as actividades inclusivas sobre o autismo e etnia xitana.

E grazas a este premio, puidemos traer a Pablo Otero, quen realizou uns divertidos obradoiros en torno á palabra escrita, debuxada, inventada, recreada... e a oralidade, sen esquecernos da vertente plástica e visual!

E claro, como a nosa Biblio quere seguir sumando colaboradores, convidamos a estes obradoiros ao alumnado de 4º, xa que o vindeiro curso formarán parte do novo "equipo biblio".

Inventamos máquinas tolas: especiais, imposibles, absurdas, que valen para todo ou non valen para nada... - pero tamén inventamos palabras para acompañalas. Foi divertidísimo!








E logo, rolda de exposicións destas máquinas inventadas.




E despois de tomarnos un respiro, fixemos outro obradoiro xogando a crear imaxes coas letras que compoñen as palabras, de forma que os deseños tranmitan a propia idea da palabra. Interesante, verdade?






Grazas Pablo! Pasámolo xenial!

venres, 28 de abril de 2023

Manu e Julen contan "Maruxa"

Hoxe Julen e Manu, de 4º de Primaria, quixeron contar un conto para os peques do cole, e non puideron escoller mellor, xa que grazas a eles rematamos este "Mes dos Libros" coa historia de Maruxa, un conto escrito por Eva Mejuto publicado pola editorial OQO e do que eles mesmos, anos atrás cando estaban en infantil, recrearon a súa historia empregando a técnica de stop-motion para participar no concurso de animación "Nós tamén creamos".


Fixéronno xenial e ao rematar, vimos o audiovisual creado por eles mesmos alá polo ano 2019. Quen nos ía dicir que tempo despois íadelo contar para todos na biblio, verdade rapaces?




Si, si... estades pensando o mesmo: que vós tamén queredes ver o vídeo. Pois aquí vos deixo o incríble resultado da nosa particular versión de "Maruxa" e tamén un vídeo resumo de como se fixo a animación do filme.

Que lindos recordos, a que si?

Grazas rapaces pola contada!

mércores, 19 de abril de 2023

Voluntariado de lectura: Mario e Uxía contan "Natacha".


Hoxe Mario e Uxía contáronnos un capítulo de Natacha, de Luis María Pescetti, no que Natacha quere convencer á súa nai de que non hai nada de malo por adoptar un can da rúa ao que lle pon de nome "Rafles". O fixeron de marabilla e ademais as historias desta rebuldeira encandilan sempre a grandes e pequenos. 

Compartiron con nós esta sesión de contacontos o profesorado de Miranda de Ebro que estes días visítanos dentro do "Programa Observa Acción".



E Diego contounos de novo Queres xogar conmigo?, de Eric Carle.

Grazas pola contada, rapazada!

venres, 31 de marzo de 2023

Voluntariado de Lectura: Jimena e Uxía contan "Cocorico"

Premendo nesta imaxe accedes ao álbum completo de fotografías.

E para rematar o trimestre, Hoxe na biblio Jimena e Uxía contáronlle aos peques do cole un dos seus contos favoritos, "Cocorico", escrito por Marisa Núñez e fermosamente ilustrado por Helga Bansh publicado pola Editorial OQO, que ademaís está musicalizado e teatralizado a través da técnica de stopmotion que nos encanta ver unha e outra vez.



Como gozamos coa historia de Cocorico!




E como sempre, rematamos a sesión cunha foto para o recordo.

Grazas pola contada, rapazas!

venres, 17 de marzo de 2023

Voluntariado de lectura: Diego conta "Queres ser o meu amigo?"

 

E hoxe Diego contounos este marabilloso conto, coma todos os de Eric Carle, Queres ser o meu amigo?. E aínda que os peques xa coñecían o conto e sabían o que ía a pasar tras cada páxina, non perderon detalle das aventuras deste ratiño en busca da amizade perfecta.

Se vos presta, podedes recordar a historia a través deste vídeo.






E rematamos coa foto de grupo. Grazas Diego pola contada!

xoves, 16 de marzo de 2023

Voluntariado de Lectura: Mario e Aroa contan "Primeiro amor en Ferrol"


E hoxe Mario e Aroa contaron este contiño do Bolechas que fala da nosa cidade "Primeira historia de amor en Ferrol", que fai un percorrido polos lugares máis emblemáticos da nosa cidade: o porto, o Cantón de Molíns, a praza de Armas, a praza de Amboaxe... e no que as xemelgas Pili e Loli sufren de mal de amores, desde a inocencia da nenez.






E rematamos, coma sempre, cunha foto de grupo. 
Grazas pola contada, un día máis!