venres, 29 de novembro de 2019

Unha divertidísima xornada de xogos populares

Este venres vivimos unha divertidísima xornada de xogos populares organizados polo alumnado de 5º e 6º de Primaria, coa colaboración da profe Paula.
Despois de realizar un traballo de recollida de xogos populares entre as familias de todo o alumnado de Primaria, os maiores do cole encargáronse de preparar a xornada de xogos para este venres. Tiveron que artellar os equipos, preparar o material e dar as explicacións oportunas en cada un dos xogos. A verdade é que o fixeron de 10, e grazas a eles puidemos pasar un rato divertidísimo.


Temos que darlle o noso máis sinceiro agradecemento a Xaime, 
que estes días non parou de rebulir no seu obradoiro 
para construir para o cole estes brinquedos tradicionais. 
Grazas, grazas, grazas.

Queredes saber a que xogamos? Pois a carreiras de sacos, carreiras de esquís colaborativos, loitas de equilibrio, á petanca, ao tiro ao branco con gomas, á chave e á plataforma de buratos.... 

E as profes? As profes, desta volta foron un equipo máis, xa que a xornada foi coordinada polo alumnado de 5º e 6º. 

E rematamos o día facendo bailar os nosos trompos e peóns. A verdade é que foi unha xornada moi divertida e os xogos que aprendimos pasarán a formar parte do noso repertorio. 
Que vivan os xogos tradicionais!!!


Preme AQUÍ se queres aceder ao album con todas as fotos.










xoves, 28 de novembro de 2019

Obradoiro de Nutrición e Alimentación Saudable no Mercado de Chispa

Hoxe foi un día especial, xa que grazas á colaboración da ANPA do cole puidemos contar coa presenza dunha nutricionista para realizar unha xornada de obradoiros sobre alimentación saudable e nutrición. E que mellor lugar para levala a cabo que o noso "Mercado de Chispa"?

Non podemos facer máis que darlle as grazas a María Eugenia Pastor Beceiro, experta en nutrición, que tiña preparado uns obradoiros moi activos para cada un dos diferentes cursos. Púxonos a traballar a todos... desde os máis pequenos aos máis grandes, a través de xogos e elementos lúdicos cos que pretendeu concienciar aos nenos e as nenas sobre o mundo dos ultraprocesados. Realmente, dounos moitas claves para comprender que a verdadeira revolución está na cesta da compra.

Tamén temos que darlle as grazas a Rebeca del Río, nai de Érica e tesoureira da ANPA, fotógrafa en Mirada de Madrina, por esas preciosas fotos que saca sempre e que fan que "O Mercado de Chispa" luza aínda máis bonito. 
Estade atentos porque os Rebuldeir@s de Pazos están ultimando a súa producción para amosarvos todo o que aprenderon... 
E ata aí podo contar! 

martes, 26 de novembro de 2019

Contacontos no recreo: Aitana e Ariadna contan "Tres osos"

E hoxe Aitana e Ariadna deleitáronnos cunha doce versión de Riciños de Ouro, "Tres Osos" da editorial OQO contada coas voces ao unísono que deixounos embelesados. 
Noraboa, nenas, por incoporar ese recurso expresivo que captou por completo a atención dos máis peques. 


Agardamos vervos de novo pola biblioteca para contarnos outro conto, pois o fixestes de marabilla!

E se queredes ver o audiovisual deste conto realizado coa técnica de "StopMotion" podédelo facer premendo na imaxe a continuación. 

Forma parte da serie de animación infantil "Contos no Camiño" realizada para a TVG.
A serie que consta de 26 capítulos de 10 minutos de duración e está dirixida a un público de 3 a 7 anos. Cada capítulo corresponde á adaptación dunha historia tradicional ou contemporánea publicada en forma de álbum ilustrado por OQO editora. 
Son para velos todos, todos, todos! 

luns, 25 de novembro de 2019

Unha porta violeta na parede

Este ano, para conmemorar o #25N, Día Internacional pola eliminación da Violencia contra as Mulleres, decidimos tinguir de violeta a parede da entrada do noso cole cun mural con mans violetas a letra da canción de Rozalén, algún cartel elaborado polos maiores, libros con mirada feminista... e por suposto, a nosa Chispa, que tamén viste de morado por un motivo claro.



O 25N xuntouse todo o alumnado de Primaria para facer unha lectura colectiva do libro "Xela volveuse vampira" de Fina Casalderrey e escoitar e cantar (en galego) a canción de Rozalén "Unha porta violeta".

Podedes escoitar unha versión interpretada en LSE polo alumnado do CEIP da Barqueira, premendo nesta imaxe:


Tamén elaboramos unha pancarta na que asinamos todas as persoas que formamos parte da nosa Comunidade Educativa en contra das violencias á muller e que colgamos no corredor exterior do Centro.

Coma sempre, podedes ver máis fotos premendo en calquera das imaxes desta entrada.


xoves, 21 de novembro de 2019

E máis Digicraft no teu cole: buscadores e Toontastic

Todas as semanas temos unha sesión de "Digicraft no teu cole" en cada un dos niveis para os que están plantexadas. Empregamos os nosos grupos de traballo cooperativo e certamente isto nótase, pois cada vez traballan mellor entre si de forma autónoma.

Na terceira sesión de Digicraft no teu cole empregamos os buscadores de internet para lograr completar un rosco de pasapalabra. Hai que dicir que algunha resposta xa a sabíamos, pero o logro estaba en amosar os resultados das nosas pesquisas nas tabletas. Ufff!!! Que difícil é buscar cando se sabe a resposta!!! 



E na cuarta das sesións demos renda solta á nosa imaxinación e demostramos que temos moito, pero que moito talento creativo. Coa app Toontastic creamos as nosas propias películas animadas. Escollemos escenarios, personaxes , inventamos os diálogos e planificamos a acción. 
Logo, por parellas, buscamos un sitio tranquilo para poder grabar ben o audio das nosas películas e para non interferir nas grabacións dos nosos compañeiros.

Algunhas das creacións que resultaron poden incluso gañar un premio "Mestre Mateo". Se os autores e autoras, "ceden os seus dereitos", en breve amosarémosvos algunhas delas...

Por se queredes probar en casa, deixámosvos aquí un enlace á app para que a descarguedes nos vosos dispositivos portátiles e deixedes voas a vosa imaxinación.







xoves, 14 de novembro de 2019

Contacontos no recreo: Icía e Polola contan "Yo mataré monstruos por ti"


Parece que estas rapazas estanlle collendo o gusto a isto dos contacontos, pois Icía e Polola repiten.
Nesta ocasión contáronnos "Yo mataré monstruos por ti", escrito por Santi Balmes e  ilustrado por Lyona. Non era a primeira vez que se contaba este conto na biblioteca, pero é que a temática dos monstros gústanos tanto que non nos cansamos de escoitar este tipo de historias.

Se por casualidade aínda non coñecedes este conto, ou se queredes recordalo, podedes ver o vídeo a continuación.

martes, 12 de novembro de 2019

Contacontos no recreo: Ezequiel conta "Los animales me aterrorizan"


E seguimos contando contos no recreo... Desta volta foi Ezequiel quen se animou a contarlles un conto de medo a os pequenos do cole, pero escolleu un deses contos que máis que medo ao fin o que dan é risa. Como nos gusta pasar da intriga á gargallada.

Que ben o pasamos escoitando "Los animales me aterrorizan" de Babette Cole. 

Esta autora, en moitas ocasións irreverente, atreveuse a contarlle aos nenos e nenas o que antes ninguén se atrevera. Os seus libros son referentes en materia de igualdade, rompen sempre estereotipos, e o que os fai realmente efectivos é que emprega unha linguxe sinxela, natural e sen complexos, tan cercanos á realidade infantil como divertidos e locos.

Se o perdeste, recomendámosvos que pasedes pola biblio para lelo.



luns, 11 de novembro de 2019

Polo San Martiño, trompos ao camiño

Como di o refraneiro popular, “polo San Martiño, trompos ao camino” e “polo San Amaro, trompos ao faiado”. Iso significa que o trompo se xoga tipicamente nesta época do ano, entre o 11 de novembro e o 15 de xaneiro.
O trompo chámase tamén peón, buxaina, bailarete… É un xoguete de madeira que leva na súa punta un cravo de ferro ou ferrón sobre o que vira o trompo. A parte de arriba chámase pirucho e a máis ancha é a barriga. Para facer bailar o trompo hai que amarrar unha piola, que é unha corda de medio metro que se amarra da maneira máis tensa posible arredor da barriga do trompo e que se solta rapidamente para facelo virar. No estremo da piola adóitase facer un nó para evitar que escorregue entre os dedos.
Este curso propuxémonos aprender todos a bailar o trompo e claro, hoxe foi o día perfecto para comezar a practicar. Para os máis pequenos do cole, isto da piola é imposible, así que de momento terán que conformarse coas buxainas de man, ainda que non só se apuntan a xogar con elas os pequenos... 
Algunha profe que ten o vicio de coleccionalas, sempre trae algunha de cada un dus lugares polos que viaxa, e ten buxainas de diferentes países. Vai ser que isto do pión é unha cousa internacional, seica.
Queredes ver o ben que o pasamos? Pois preme na seguinte foto.

venres, 8 de novembro de 2019

E chegaron os escornabots para a biblio

Como todos saberedes xa, neste curso a nosa biblio pasa a formar parte do Proxecto de Bibliotecas Creativas, que ten como finalidade introducir dentro das bibliotecas escolares un recanto de experimentación e creación empregando a robótica e a linguaxe de programación para mellorar as habilidades manipulativas, de expresión, razoamento lóxico e a alfabetización múltiple.

Pero o que non esperaban algúns era que os robots viñeran "en pedazos"... Así que hoxe o alumnado de 5° e 6° de Primaria tiveron unha sesión de robótica algo diferente. 



Tarefa do día: montaxe dos escornabots.
E por se alguén o dubidaba, funcionaron todos á primeira!!!

mércores, 6 de novembro de 2019

Digicraft no teu cole: Draw your game

E na sesións desta semana de Digicraft no teu cole pasámolo xenial, ademais de aprender un montón. 
Fomos quen de crear o noso propio videoxogo empregando só unha folla de papel e rotuladores. Increíble pero certo!!!



Seguindo unhas pequenas instruccións creamos os nosos escenarios (rotulador NEGRO), colocamos algunhas plataformas de salto (rotulador VERDE), os elementos a manipular (rotulador AZUL) e por suposto aos nosos viláns (rotulador VERMELLO).

Escaneamos e listos... A xogar no noso debuxo!!! 

Despois dos primeiros intentos, démonos conta de cómo poderíamos mellorar o deseño tanto do escenario como dos elementos de xogo, e así, redeseñamos o noso propio videoxogo.

Queres probalo en casa? Colle a túa tableta ou teléfono e escanea este código QR para descargarte a aplicación gratuitamente e a xogar!

domingo, 3 de novembro de 2019

As maletas Rebuldeir@s

Ainda que esta actividade desenvolveuse durante o mes de outubro do presente curso, recollémola agora, unha vez finalizada.

Dentro do “Programa CA/AC (Cooperar para Aprender/Aprender a Cooperar) para ensinar a aprender en equipo” que se está a desenvolver este ano no cole, realizáronse unha serie de dinámicas de cohesión.

Unha das que nós consideramos máis especiais é a denominada “A maleta”. Esta dinámica pertence ao "ámbito de intervención A", e ten como finalidade favorecer a interrelación, o coñecemento mutuo e a distensión dentro do grupo.

Para a súa realización o alumnado debe traer ao cole unha maleta chea de obxectos representativos da súa personalidade que indiquen aficións, habilidades ou mesmo manías. A maleta pode conter obxectos pero tamén fotos, libros, cancións... Os/as nenos/as (con axuda do seu familiar) explicarán que representa e significa cada un.

Queredes ver que foi o que pasou nestas asombrosas presentacións de si mesmos dos Rebuldeir@s? Pois non vos perdades o vídeo a continuación e, coma sempre, podedes acceder ao album de fotos con todas as imaxes premendo en calquera das de esta entrada.  

mércores, 30 de outubro de 2019

Castañas e calacús na véspera da Noite de Samaín.

Este mércores, na véspera da Noite de Samaín, no cole vivimos unha xornada de celebración por partida dobre.
Á primeira hora repartímonos por grupos e fixemos obradoiros con castañas: elaboración de cornetes para as castañas, tres en raia castañeiro, carreiras de relevos con castañas, bomba castañeira e o clásico papa-castañas. 
Que ben o pasamos, cantas risas e que olor tan rico daban esas castañas que Xaime e o profe Luis estiveron asando mentres o resto andaba a brincar por todo o cole.

E despois, claro... Había que degustar esa "delicatessen" que con tanto mimo prepararon. Boa conta demos delas... non sobrou nin unha presadiña. 


E xa coa barriga chea, prendimos as candeas das nosas cabazas e con todo o cole ás escuras subimos ata a nosa Biblioteca na que tivemos unha máxica sesión de contacontos de medo.
Un ano máis, cada unha das aulas elaborou unha terrorífica historia coa que sorprender aos seus compañeiros. 



Ademais, os Rebuldeir@s de Pazos elaboraron coa axuda da súa profe, un audiovisual que deixou a máis dun coa boca aberta e tremendo de medo. Podédelo ver a continuación, se vos atrevedes, claro!!!



Pero que medo pasamos!!!

luns, 28 de outubro de 2019

Celebramos o Día das Bibliotecas Escolares coa nosa biblioteca chea de maxia

Hoxe, 28 de outubro, a nosa biblioteca encheuse de maxia da man  man do Mago Benxamín, celebrando así o Día das Bibliotecas Escolares e grazas á colaboración da ANPA do colexio.


Grandes e pequenos pasamos un rato divertidísmo e sorprendente cos truques de Benxamín, quen non deixou indiferente a ninguén dos alí presentes. 
Unha pandeireta con metros e metros de cinta no seu interior, unha corda con e sen puntas, un mapa desordeado que se coloca só, un coelliño que vai e vén, unha xirafa á que lle medra o pescozo, unha carta que quéimase e volve aparecer, un deportista colorido... todas estas cousas fixéronos ilusionarnos con que a maxia realmente existe. 

Foi unha xornada inesquecible, que ademais puidemos compartir coas familias que puideron achegarse ata o cole, ás que tamén lles estamos moi agradecidas.

Tras o espectáculo, o Mago Benxamín deixounos unhas palabras máxicas escritas no libro de visitas da Biblioteca. Moitas grazas e convidado quedas a voltar sempre que queiras. 


E é que a Biblioteca sempre será o lugar onde todo pode suceder, onde a maxia existe...

venres, 25 de outubro de 2019

Celine e Irene sorprendéronnos cunha charla sobre medioambiente e reciclaxe.


Este venres Celine e Irene quixeron darnos unha charla sobre a importancia de coidar o medioambiente e o problema da contaminación plástica.
Déronnos uns consellos para reducir a nosa pegada no planeta, reducindo, reutilizando e reciclando os nosos desfeitos. Porque unha cousa está clara: canto menos contaminemos o noso planeta, máis doado será mantelo limpo.



Xa vedes, no cole de Pazos temos grandes activistas polo clima. Seguindo os pasos de Greta Thunberg, elas mesmas deseñaron o cartel anunciador da súa charla, documentáronse, prepararon o seu guión, e contáronlle aos seus compañeiros e compañeiras o porqué da importancia de tomar parte nun movemento de cambio para a conservación do noso planeta.

A verdade é que non deixaron indiferente a ninguén: tanto profes como compañeiros non puidemos facer outra cousa que felicitalas.
O planeta precisa de máis nenas e nenos valentes coma vós!





xoves, 24 de outubro de 2019

Contacontos no recreo: Diego Amado conta "Sopa de nada"


E xa lle estamos collendo gusto a isto dos contacontos no recreo. Hoxe foi a quenda de Diego Amado e contounos "Sopa de nada", da editorial OQO. Unha sorprente receita que saiu da nada. Hummmm... curioso cociñeiro! 

Grazas Diego por deixarnos tan bo sabor de boca. E se vos gustou, xa sabedes que podedes levar este libro con tan máxica receita ás vosas casas ou vir degustalo na biblioteca.

mércores, 23 de outubro de 2019

Digicraft no teu cole: primeiras sesións.


E como moitas e moitos de vós saberedes, fomos seleccionados entre máis dun centenar de centros en toda Galicia para desenvolver o Programa Digicraft no teu cole, que busca  axudar aos nenos e as nenas a adaptarse a unha sociedade dixital e amosarlles as posibilidades que ofrece a tecnoloxía, non só como consumidores, senón tamén como creadores.


Consta de 2 itinerarios para 3º, 4º, 5º e 6º de Educación Primaria. O primeiro deles está baseado en actividades de realidade aumentada e videoxogos, e o segundo itinerario xirará entorno á robótica e a intelixencia artificial.
O programa ten unha duración de dous cursos escolares, e para o vindeiro incorporará ademais ao alumnado de 1º e 2º de Primaria. 

Ten unha dotación de 12 tabletas e 2 kits tecnlóxicos, que grazas á Fundación Vodafone e AMTEGA poderemos disfrutar durante os dous cursos que durará o programa.

E queredes saber como está resultando? Pois a verdade é que é unha experiencia xenial! O alumnado traballa moi concentrado e ademais de xeito lúdico, creandose un clima moi divertido na biblioteca. Preme na foto de abaixo se queres ver máis.


Nesta primeira sesión traballamos coa aplicación Wafty, que permite debuxar no espazo. Istos son os nosos primeiros pasos na realidade aumentada. Empezamos!



domingo, 20 de outubro de 2019

Primeira semana de retos STEAM na biblio: Retos Lego

Despois do recreo apareceu unha cortiza nova colocada no corredor da Biblioteca cuns coloridos carteis que invitaban a pararse a ler...


Que se nos gustan os LEGO? Claro que si! Pero, isto do reto de que vai? Unha cousa estaba clara: se é un reto e é con LEGO's, de seguro que imos pasar un rato do máis divertido poñendo as cabezas en acción.

O dito: na cortiza había moitos máis carteis nos que explicaban as normas destes retos, e a verdade é que tiñan moi boa pinta todo este asunto do reto.

Apuntámonos nunhas listaxes para subir á biblioteca por quendas: 12 nenos/as máximo para os retos LEGO e 6 neno/as máximo para os retos DUPLO. E así, con certa incerteza, chegamos á primeira semana de Retos STEAM na biblio.


E alí estaban: un montón de tarxetas con diferentes propostas para crear usando pezas LEGO. Unhas máis abertas e outras máis concretas, pero nas que tiñamos que poñer a cabeza en funcionamento se queríamos resolver.

Unha das propostas estrela foi a de crear unha torre tan alta como a túa perna que se sostivera ela soa, e claro... chegaba unha altura nas que as cousas se poñían difíciles, polo que había que artellar solucións (unhas máis acertadas que outras, claro!).


E o ben que nos sentimos cando superamos os retos? Non hai nada mellor que a satisfacción do traballo ben feito. 


E ao rematar? Un diploma de participación e unha goma de borrar con forma de peza LEGO, para lembrarnos que os erros tamén son unha forma moi boa de aprender. 


Tes acceso a todas as fotos, premendo en calquera imaxe desta entrada.