GAMIFICACIÓN CON SABOR A GRECIA

Dende a Biblioteca Xoán Farias,  o noso cole promoveu  unha xornada este venres na que, a través dunha gamificación, deu a coñecer á Comunidade educativa un proxecto de robótica vinculado ao Erasmus+ celebrado en Grecia no que, o pasado febreiro, participou parte do profesorado xunto a outros mestres da comarca.

Esta foi unha primeira sesión levada a cabo para a rapazada, celebrando así o Día da Poesía e o Teatro. 

Aínda que o eixo vertebrador é a cultura grega, o desenvolvemento xirou en torno aos dous grandes proxectos deste colexio: Robótica e Educación nutricional. Para iso puxemos en valor dous novos escenarios: un espazo creativo dentro da propia  Biblioteca (zona maker), e o recén estreado Mercado de Chispa, no que se potencian os hábitos saudables de alimentación e consumo, empregado tamén para traballar as matemáticas dende unha perspectiva máis vivencial e contextualizada.

Agradecemos a Xaime, o noso conserxe e a Aurora, a encargada do comedor, a súa axuda, sen a cal -coma sempre- as cousas seríannos moito máis complicadas.

PROBAS: 

Xogos Olímpicos (Circuíto de puntería e velocidade), no ximnasio e patio: Artemisa

Sirtaki (baile), na aula de música: Apolo

Menú grego (Ensalada, Moussaka, iogur grego), no Mercado de Chispa: Hermes

A Curuxa de Atenea move a cabeza (Arduino), na BibliotecaI: Atenea

Templo grego (Robot Mind), na Biblioteca II: Afrodita

Alfa e omega (DOC), no salón de actos: Poseidón

Deuses gregos (Dramatización. Chroma), na sala de audiovisuais: Zeus 

E Chronos cronometra o tempo.

E A XINCANA EMPEZOU!

Haberá unha segunda xornada que terá lugar o luns 8 do vindeiro mes, e estará aberto ás familias e resto da comunidade educativa.

Seguiremos contándovos, isto é un avance...

BOAS FESTAS A TODOOOS!!

Agradecemos as fotos da visita de Papá Noel a Juan Carlos, o papá de Jimena

Traballando o Día CONTRA A VIOLENCIA DE XÉNERO.

Pola mañá, e promovida pola ANPA do centro, asistimos en dúas sesións, a unha actividade da Asociación Lisístrata -Onde hai paz hai cultura; onde hai cultura, hai paz-: "A HISTORIA EN FEMININO". 

Ao longo de dúas sesións fixemos un percorrido pola historia contada dende un ángulo diferente ao que a maioría dos libros de texto nos teñen acostumados. Ana Hermida amosounos un montón de mulleres que xogaron na historia un papel tan importante ou máis que calquera dos homes científicos, políticos, deportistas, pintores recoñecidos dende sempre. Esta charla-contacontos estivo adicada a esas esquecidas, as valerosas e pioneiras coas que cada curso traballamos, pero que necesitamos seguir coñecendo porque hai moito por lles devolver, non si?

Deixamos algúns vídeos para que recordedes a algunhas das mulleres que vimos hoxe pola mañá, pero xa sabedes que podedes investigar e ampliar todo este coñecemento. Hai moitas mulleres esperando o seu recoñecemento. 
Hoxe Ana Hermida falounos de Irena Hendler, Hellen Keller, Florence Nightingale, Hipatia de Alejandría, Caroline Herschel, Diane Fossey, Marie Curie, Sophie Germain; María, "la judía"; Valentina Tereshkova, Ada lovelace, Hedy Lamarr, Nancy Johnson, Beaulah Louise Henry, Josefine Crochrane, Simon Biles, Nadia Comanecci e Olga Korbut entre outras. 

 Grazas unha vez máis á ANPA por xestionar esta interesante actividade e grazas a Ana Hermida pola súa amenidade e por recordarnos a tantas e tantas mulleres importantes na historia.

EXPOSICIÓN NA FUNDACIÓN ABANCA: A FRONTEIRA INFINDA

Onte visitamos a Afundación para  visitar a exposición  "A fronteira Infinda", unha exposición dos pintores galegos e a emigración.

Logo de facer unha reflexión sobre o que supón para calquera persoa ter que emigrar, marchar do seu país polos motivos que sexa, pensamos na arte como transmisión dos sentimentos e propuxéronos facer un xogo para o que nos dividimos en cinco grupos. 
A través dunhas fichas que orientaron a nosa investigación na sala, tivemos que localizar uns pintores e as súas obras e logo facer unha pequena exposición co resultado ante os demais compañeiros e compañeiras.
Así coñecemos as obras de Isaac Díaz Pardo, da man das Súper Galegas: Icía, Marta e María.
A Jorge Castillo e José Mª Labra, cos Súper Piratas do Atlántico:  Irene, Ezequiel e Laura.
A Lago Rivera e Tino Grandío, cos Buscadores do coñecemento: Yago, Álex, Jatniel e Martín.
Aos irmáns Mario e Eugenio Granell, cos Necesitados dun heroe: Iria, Gaia e Fusía.
E a Leopoldo Nóvoa, cos Súper Cacharreiros: Hugo, Igor e Alejandro.

Por último, un obradoiro no que debuxamos e acabamos con tinta china uns pequenos debuxos onde plamamos as nosas preocupacións (guerras, machismo, polución...) e que logo quedaron recollidas nunhas carpetiñas. Estivo fenomenal!!

LETRAS GALEGAS 2018 - Mª VICTORIA MORENO

MULLERES

Estas semanas pasadas estivemos preparando na aula uns traballos sobre mulleres que destacaron ou destacan na historia por ser pioneiras no seu campo. O traballo tivo unha parte de documentación na que recorremos a, polo menos, dúas fontes: algún dos libros sobre mulleres da exposición da Biblioteca, e outra de Internet. Coas imaxes desas mulleres, tiradas da rede e os datos recollidos en ambas fontes, elaboramos unha presentación en Impress, que logo amosamos aos nosos compañeiros en tres sesións, nas cales tivemos de invitados aos nenos e nenas de 1º, 2º, 3º e 4º.

E este é o listado das mulleres sobre as que investigamos:

* Iria: Amelia Earhart, aviadora estadounidense, a primeira en tentar a primeira viaxe en avioneta arredor do mundo.

* Laura: Diane Fossey, zoóloga que adicou o seu labor científica a estudar e defender os gorilas no seu hábitat.

* Marta: Cheryl Bridges, atleta estadounidense que bateu o récord da maraton en varias ocasións.

* Gaia: Coco Chanel, deseñadora de alta costura francesa. Revolucionou a moda feminina.

* Diego: Ella Fitzgerald, cantante de Jazz."A Raíña do Jazz".

* Marcos: Audrey Hepburn, actriz na época dourada do cine en Hollywood,  e activista belga, que adicou gran parte da súa vida a Unicef.

* Martín: Valentina Tereshkova, 1ª astronauta en viaxar ao espazo, despois de Yuri Gagarin.

* Nuria: Annette Kellerman, nadadora profesional australiana, actriz, escritora e emprendedora. A primeira muller en utilizar un deseño propio de bañador dunha soa peza.

* Paula: Alice Blanchet, pioneira do cine. Primeira persoa en realizar unha película.

* Juan: Violeta Parra, cantautora, pintora, escultura e ceramista chilena. Gran divulgadora do folklore de América do Sur.

* Keira: María Callas, soprano grega considerada a cantante de ópera máis importante do século XX.

ESPALLANDO POESÍA! FELIZ DÍA!!

CELEBRAMOS O DÍA DE ROSALÍA

Esta mañá celebramos o DÍA DE ROSALÍA, coa lectura dalgúns dos seus poemas, a cantiga "A Rosalía", e a visita á exposición dos nosos traballos. Tamén copiamos unha bonita idea que vimos no CEIP de Esteiro e que nos pareceu axeitada para este día: "Os grolos de Rosalía", pero nós temos unha condición que cumprir, se alguén leva un groliño destes, é co compromiso de recitalo na casa ás familias. Hai que ser legais!! Para que está a poesía? Para compartila e gozar dela! Non si?

Máis de Rosalía no noso blog

EXPOSICIÓN DE 1º E 2º - PROXECTO DO CORPO HUMANO-

INTERESANTES FOTOS SE PREMEDES NESTA IMAXE. ESTADES AVISADOS!

TRABALLO POR PROXECTOS

Este é o resultado do proxecto levado a cabo en 1º e 2º, neste primeiro trimestre, sobre o CORPO HUMANO.

Hoxe, na sala de audiovisuais, fixeron unha coidada exposición dos coñecementos adquiridos. Falaron de todos os sistemas e aparellos e amosaron o funcionamento dalgún deles dunha forma moi visual e lúdica. 

Invitaron aos seus compañeiros e compañeiras das outras clases, e a todos os pais e nais que puidesen asistir. Xuntos pasamos un tempo moi agradable escoitándoos, e eles e elas fixérono moi ben; era a súa primeira exposición e parecían uns profesionais! Como será a seguinte?
 

NORABOA A TODOS E TODAS POLA MAGNÍFICA SESIÓN COA QUE NOS AGASALLASTES.

FIXÉSTELO FENOMENAL!! 

PLAN PARA ESTE ENTROIDO: DISFRAZ - ARTE!!! DE PINTOR OU PINTORA

Todos enterados??? Todos preparados??? Todas listas??? E dispostas a pasar un ENTROIDO DE ARTE???

Comezamos coa GRAN EXPOSICIÓN de libros de ARTE que ocupan a entrada do noso centro. O reloxo xa está posto en marcha e só queda que te animes a DISFRAZ-ARTE!!!

VISITA Á EXPOSICIÓN "100 AÑOS ESCUELA OBRERA FERROL" e BARRIO DE CANIDO

Tiñamos pendente unha entrada moi interesante, e xa vai sendo hora de cumprir!!!

O pasado 21 de outubro, fixemos unha visita á sala Carlos III, en EXPONAV,  onde puidemos ver a Exposición "100 años Escuela Obrera Ferrol".

Libro da Exposición

Unha exposición que nos trasladou aos comezos do século XX. Guillermo Llorca Freire conta no segundo capítulo do libro que a escola foi inaugurada un 3 de maio de 1915 para os fillos dos obreiros da "Sociedad Española de Construcción Naval", contando cunha primeira matrícula de 120 alumnos.

A continuación demos un paseo ata chegar á parte alta da cidade, a Canido. Un barrio enxoiado coas obras de arte que durante estes últimos anos nacen nas paredes cada primeira fin de semana de setembro. Unha idea do artista ferrolán Eduardo Hermida.

No Cantón de Molíns

Un momento de descanso no Cantón

Coa escultura de José Canalejas, obra do escultor Miguel Couto

Diante da Concatedral de San Xiao

Á sombra dos cedros

Entrando no emblemático edificio da Pescadería, de Rodolfo Ucha

Subindo cara ao barrio de Canido pola rúa San Diego

Subindo cara ao barrio de Canido pola rúa San Diego

 E logo deste paseo, chegamos a Canido onde puidemos gozar das moi variadas versións das Meninas... Se tedes interese en ver máis imaxes, ao final da entrada atoparedes o enlace.

  Todas as  fotos da visita, neste enlace.