Digicraft no teu cole

Durante este curso tamén participamos no proxecto Digicraft no teu cole, implementando unha serie de actividades tecnolóxicas que permiten que o noso alumnado desenvolva habilidades dixitais, fomenta a creatividade e o traballo en equipo. 

Na avaliación inicial da competencia dixital do noso alumnado, observamos que xa tiña un coñecemento medio de Scratch como ferramenta de programación, o que nos permitiu ter un punto de partida para o uso das demais aplicacións de programación. 

Actividades como Que animal son?, Aventura Dixital, Pesadelo na Biblioteca, And the Oscar goes to…, Imos de viaxe a…, ou Creamos un vídeoxogo, permítenlles desenvolver competencias dixitais clave, a colaboración e o pensamento crítico, empregando a tecnoloxía de maneira innovadora e responsable, preparándose así para os desafíos do século XXI.

Preme nesta imaxe se queres ver algunha fotiño máis.

Un ano máis de Digicraft no teu cole

Este ano seguimos a empregar o material de Digicraft no teu cole, aínda que despois de tres cursos participando no proxecto, dun xeito moito máis creativo, ampliando así a proposta de actividades.

É xenial poder contar co material tecnolóxico que ofrece o proxecto de Digicraft no teu cole dentro do noso "Recanto Argalleiro", pero o que realmente é marabilloso é ver cómo o noso alumnado fai propias estas ferramentas tecnolóxicas e amplía as súas posibilidades de uso. 

Ao longo do curso afondamos nos dous itinerarios propostos: realidade aumentada e videoxogos e intelixencia artificial e robótica. Aprendemos así a empregar novas linguaxes e ferramentas que amplían os usos da Biblioteca para convertila así nun verdadeiro laboratorio da aprendizaxe.

E como mostra, por aquí deixamos algunhas fotos.

Aprender así, si que mola!

Comezamos o segundo itinerario Digicraft.

O ano pasado xusto cando iniciábamos o segundo itinerario confinábannos. Con moitos problemas de conectividade o proxecto "Digicraft no teu cole" fixo un parón por causa de forza maior. Pero este ano... 

COMEZAMOS O ITINERARIO DE ROBÓTICA E INTELIXENCIA ARTIFICIAL!!!

Xa sabedes que a metodoloxía Digricraft fundaméntase na aprendizaxe colaborativa e busca a participación activa do alumnado a través do xogo e a experimentación.

Preténdese así achegar o mundo dixital ao mundo físico, empregando tecnoloxía en actividades que impliquen a mobilización tanto de habilidades motoras como de pensamento, promovendo o traballo en equipo. 

Digicraft no teu cole: Quiver para rebuldeir@s

Por fin, e aínda que xa no final do trimestre, conseguimos arrancar co Proxecto Digicraft no teu cole no que xa nos iniciáramos o curso pasado, e que alá por marzo fixo que freáramos en seco co segundo dos itinerarios sen comezar. 

Moitos dos recursos do programa xa os estamos a empregar nos tempos de lecer na Biblioteca desde o inicio de curso. Mais o proxecto "Digicraft no teu cole" ten unha metodoloxía concreta que ten como obxectivo formar ás nenas e nenos de entre 6 e 12 anos nas competencias dixitais que lles permitan desenvolver o seu potencial, a través de diferentes entornos.

Nesta sesión, @s Rebuldeir@s empregaron a aplicación Quiver, de realidade aumentada, en concreto Quiver Mask. Desde esta ligazón podedes acceder a un montón de materiais para imprimir, colorear, escanear e xogar a lucir as máscaras tan fantásticas que creastes. 

Esta aplicación está dispoñible para Android e ios. 

Preme nas iconas a continuación para descargala no teu dispositivo móbil se te apetece seguir xogando.

Convidamos ademáis a todas as familias a que curioseedes na páxina web do proxecto "Digicraft no teu cole", xa que nela hai unha grande cantidade de materiais e recursos de libre acceso para empregar a tecnoloxía de forma lúdica e educativa nas vosas casas. 

Se algunha das propostas abertas vos parecen atractivas para compartilas cos vosos fillos e fillas, e non dispoñedes dos materiais necesarios para levalas a cabo, lembrámosvos que a nosa Biblioteca permanece aberta os martes pola tarde, de 16 a 18 horas, e previa reserva, poderíades empregar os materiais dos kits tecnolóxicos do programa que se atopan no Centro.

Digicraft no teu cole: construíndo instrumentos musicais.

Na proposta de hoxe do Proxecto Digicraft no teu cole, xogamos a construír instrumentos musicais con material de refugallo e as placas makey-makey dos kits "Instant Digital Skills". 

Pero como pode ser que uns vasos de iogur soen a batería ou que poidamos tocar o piano cunha caixa de cartón? 

Pois todo é grazas ás placas makey-makey, que tivemos que aprender a conectar e a un pequeno programiña de scratch que permite reproducir sons dos instrumentos musicais escollidos cando se pechan os circuítos eléctricos. 

Cantas posibilidades poden darnos estas ferramentas tecnolóxicas, verdade? Poderías construír un piano usando froitas? E quen di un piano, di calquera outro instrumento musical.

Mirade este vídeo porque á volta temos que argallar para facelo, eh? Estades avisados!

Digicraft no teu cole: Pirámide holográfica e cubo de realidade aumentada

Nesta sesión de Digicraft no teu cole convertémonos en cazatesouros. Para acceder aos materiais que estaban gardados nun cofre pechado cun candeado, o grupo dos tritóns de 3º e 4º de Primaria tivo que resolver unha xincana de catro probas nas que entraba en xogo o enxeño de cada equipo. Resolvéndoas correctamente todas obterían cada unha das cifras do candeado que abre o cofre.

A primeira delas estaba oculta nun mapa... tiveron que darlle un montón de voltas para dar co número agochado.

A segunda cifra conseguírona a través dunha app, mirando debaixo dun barco... Como??? Iso que volo conten eles!

A terceira estaba nun acertixo que para descubrilo tiñan que introducir unhas coordenadas GPS na aplicación de Google Maps.

E a cuarta... ai, a cuarta!!! Tivérona sempre nas mans e non se daban conta.

E así foi como conseguiron abrir o candeado do cofre. Diego Bra, o máis pequeno do grupo, foi o encargado de abrilo e... voilá! Dentro do cofre había unha pirámide holográfica que nos permitiu visualizar vídeos en 3D e catro cubos Merge cos que experimentar coa realidade aumentada. 

Foi unha auténtica pasada e fixérono todos fenomenal!

Como sei que quedastes encantados cos hologramas, déixovos por aquí un vídeo para construír a vosa propia pirámide holográfica caseira, pero lembra pedir axuda a algún adulto para facelo. 
E unha vez que a teñas feita, nesta ligazón poderás ver un montón de exemplos de vídeos holográficos para probala. 

A gozar!!!

Digicraft no teu cole: Labirinto sonoro

Na sesión de hoxe de Digicraft no teu cole coñecemos un material novo dos kits tecnolóxicos "Instant Digital Skills": as placas makey-makey. Son unhas placas similares ao mando dunha vídeoconsola, coa que se poden enviar ordes ao ordenador ou tableta ao que se atope conectado. En vez de pulsar os botóns o que facemos é pechar un circuíto mediante contactos ou pinzas de crocodilo. Así, podemos converter calquera obxecto da vida diaria nun teclado, un mando ou un rato.

Creamos un labirinto en papel empregando uns lapis con mina superconductora (4B), un pouco de papel de aluminio, uns imáns potentes e uns cables crocodilo como elementos dos circuítos, de xeito que cando uns dos imáns toque as paredes do labirinto, pecharase o circuíto e a tableta reproducirá un son, grazas a un sinxelo programiña de scratch.

Unha primeira aproximación ao funcionamento das placas makey-makey que nos serviu para refrescar na memoria esas primeiras pinceladas de circuítos electrónicos que tivemos no trimestre pasado nos obradoiros STEAM da biblioteca. Lembras?

Digicraft no teu cole: StopMotion Studio

E como case cada semana, desenvolvemos na nosa biblioteca unha nova actividade dentro do proxecto Digicraft no teu cole. Desta volta descubrimos as posibilidades que ten a técnica de animación de stop motion, empregando a app StopMotionStudio, que podedes descargar libremente desde a GooglePlay en calquera dispositivo Android ou na AppleStore para dispositivos ios.

Unha app moi sinxela que permite crear pequenas curtas de animación de forma rápida e intuitiva. Un recurso moi interesante que pon en xogo multitude de recursos creativos: elaboración de escenarios, personaxes, invención de diálogos, situacións, deseño de "storyboards"... Un feixe de habilidades postas en acción para artellar uns resultados de película.

Deixámosvos os códigos QR co acceso directo á GooglePlay e a AppleStore. Animádevos a probar tamén en casa. Quen sabe se temos entre nós algún futuro técnico de animación gañador dun "Goya".
GooglePlay

AppleStore

E máis Digicraft no teu cole: buscadores e Toontastic

Todas as semanas temos unha sesión de "Digicraft no teu cole" en cada un dos niveis para os que están plantexadas. Empregamos os nosos grupos de traballo cooperativo e certamente isto nótase, pois cada vez traballan mellor entre si de forma autónoma.

Na terceira sesión de Digicraft no teu cole empregamos os buscadores de internet para lograr completar un rosco de pasapalabra. Hai que dicir que algunha resposta xa a sabíamos, pero o logro estaba en amosar os resultados das nosas pesquisas nas tabletas. Ufff!!! Que difícil é buscar cando se sabe a resposta!!! 

E na cuarta das sesións demos renda solta á nosa imaxinación e demostramos que temos moito, pero que moito talento creativo. Coa app Toontastic creamos as nosas propias películas animadas. Escollemos escenarios, personaxes , inventamos os diálogos e planificamos a acción. 

Logo, por parellas, buscamos un sitio tranquilo para poder grabar ben o audio das nosas películas e para non interferir nas grabacións dos nosos compañeiros.

Algunhas das creacións que resultaron poden incluso gañar un premio "Mestre Mateo". Se os autores e autoras, "ceden os seus dereitos", en breve amosarémosvos algunhas delas...

Por se queredes probar en casa, deixámosvos aquí un enlace á app para que a descarguedes nos vosos dispositivos portátiles e deixedes voas a vosa imaxinación.

Digicraft no teu cole: Draw your game

E na sesións desta semana de Digicraft no teu cole pasámolo xenial, ademais de aprender un montón. 
Fomos quen de crear o noso propio videoxogo empregando só unha folla de papel e rotuladores. Increíble pero certo!!!

Seguindo unhas pequenas instruccións creamos os nosos escenarios (rotulador NEGRO), colocamos algunhas plataformas de salto (rotulador VERDE), os elementos a manipular (rotulador AZUL) e por suposto aos nosos viláns (rotulador VERMELLO).

Escaneamos e listos... A xogar no noso debuxo!!! 

Despois dos primeiros intentos, démonos conta de cómo poderíamos mellorar o deseño tanto do escenario como dos elementos de xogo, e así, redeseñamos o noso propio videoxogo.

Queres probalo en casa? Colle a túa tableta ou teléfono e escanea este código QR para descargarte a aplicación gratuitamente e a xogar!

Digicraft no teu cole: primeiras sesións.

E como moitas e moitos de vós saberedes, fomos seleccionados entre máis dun centenar de centros en toda Galicia para desenvolver o Programa Digicraft no teu cole, que busca  axudar aos nenos e as nenas a adaptarse a unha sociedade dixital e amosarlles as posibilidades que ofrece a tecnoloxía, non só como consumidores, senón tamén como creadores.

Consta de 2 itinerarios para 3º, 4º, 5º e 6º de Educación Primaria. O primeiro deles está baseado en actividades de realidade aumentada e videoxogos, e o segundo itinerario xirará entorno á robótica e a intelixencia artificial.
O programa ten unha duración de dous cursos escolares, e para o vindeiro incorporará ademais ao alumnado de 1º e 2º de Primaria. 

Ten unha dotación de 12 tabletas e 2 kits tecnlóxicos, que grazas á Fundación Vodafone e AMTEGA poderemos disfrutar durante os dous cursos que durará o programa.

E queredes saber como está resultando? Pois a verdade é que é unha experiencia xenial! O alumnado traballa moi concentrado e ademais de xeito lúdico, creandose un clima moi divertido na biblioteca. Preme na foto de abaixo se queres ver máis.

Nesta primeira sesión traballamos coa aplicación Wafty, que permite debuxar no espazo. Istos son os nosos primeiros pasos na realidade aumentada. Empezamos!

Boas novas por partida doble: Biblioteca Creativa e Digicraft no teu cole.

Sen dúbida esta fin de semana temos moito que celebrar, xa que a nosa Biblioteca entrará a formar parte no presente curso 2019 / 2020 nos proxectos de"Bibliotecas Creativas" e "Digicraft no teu cole", que buscan achegar ao alumnado a robótica e a linguaxe de programación a través de retos STEAM, introducíndoos na cultura "maker" e facendo da Biblioteca Escolar un verdadeiro espazo de creación e laboratorio de ideas.

O primeiro dos programas  - Bibliotecas Creativas - conta cunha dotación de escornabots e materiais para a impresión 3D, e desenvolverase durante 3 cursos consecutivos, nos que irase ampliando os materiais.







O segundo - Digicraft no teu cole -  ten unha dotación de 12 tabletas e 2 kits tecnolóxicos, conta cunha metodoloxía específica e desenvolverase durante dous cursos escolares.

Ambos programas están concebidos para o alumnado de 3º a 6º de Educación Primaria, aínda que queremos facer accesibles os materiais a toda a Comunidade Educativa a través de obradoiros nos recreos ou en sesións de tarde abertas ás familias.

Sen dúbida que imos sacar moi bo proveito de todos estes materiais! Empezamos en 3... 2... 1...