Semana da Prensa

Ao longo da semana nos diferentes cursos estivemos traballando sobre a prensa: os xornais, a prensa audiovisual e as novas a través da radio.

Os peques de 3 e 4 anos traballaron en torno a nova de "Kathrine Switzer, a primeira muller que correu un maratón con dorsal". Fixeron un faladoiro no que, coa axuda das súas profes averiguaron: que sucedeu, quen foi Kathrine Switzer, cándo e onde sucedeu e porqué é importante este feito, moi relacionado coa nosa particular Maratón do 8M.

Os peques de 5 anos, pola súa parte e dentro do seu proxecto dos "Pingüíns con xersei", estiveron analizando as partes das novas dos xornais (neste caso eran xornais dixitais): o titular, o subtítulo (ou explicación), a fotografía, o pe de foto e o corpo da nova. E o fixeron estupendamente. Mirade!

Os rebuldeiros estiveron compoñendo un taboleiro con follas de periódico no que colocarán as súas propias novas: o maratón de Kathrine Switzer da escola, a adopción dun pingüín da Pingüineira Punta Descuberta, e máis... Pero os tempos de secado retardou un pouco a exposición de tan grande traballo. De seguro que a vindeira semana xa teremos por aquí a foto. De momento, deixámosvos éstas do proceso.

Pola súa banda, os tritóns de 3º, fixeron de xornalistas por un día, creando as súas propias novas a partir de diversos acontecementos que tiveron lugar no cole: a maratón de Kathrine Switzer ou o musical “Historia dunha reconversión”.

Os tritóns de 4º de Primaria, ademais de traballar a estructura das novas dos xornais e crear novas a partir das fotografías dos xornais entrevistaron na nosa radio escolar "Son de Pazos" a dúas mulleres investigadoras do CITENI, Almudena Filgueira e Laura Castro, que estiveron con nós no cole para falarnos sobre o seu traballo coas plataformas eólicas offshore.

Aquí un exemplo das novas inventadas polos tritóns de 4º de Primaria:

E finalmente, os maiores de Q.S.U. elaboraron as súas propias novas, seguindo as estruturas traballadas.

Cántos xornalistas sairán de Pazos? Como vedes, hai canteira.

"MAKE IT OPEN": Un escenario de aprendizaxe sobre alimentación saudable.

MAKE IT OPEN (MIO) é un proxecto de colaboración entre diversos axentes sociais co que construir a aprendizaxe de xeito globalizado dentro da filosofía "Open Schooling". Baseado na colaboración entre diferentes escolas que estean a traballar sobre o mesmo tema, familias, expertos, etc. coa finalidade de abordar diversos escenarios de aprendizaxe que resultan relevantes para o alumnado e a comunidade na que se desenvolven. Promóvese así unha actitude de cidadanía global activa.

Open Schooling é unha oportunidade de aprender xuntos no mundo real, ampliando os horizontes da escola para aprender doutras persoas de forma colaborativa. E nós comezamos a nosa andaina dentro deste formato de escola aberta da man dos Museos Científicos de A Coruña. 

Así que comezamos a nosa andaina dentro do Make it Open coa adaptación á nosa realidade dun escenario de aprendizaxe sobre alimentación saudable, aproveitando os recursos que tiñamos máis próximos, e para iniciar ao noso alumnado na busca de respostas por si mesmos e a elaboración de produtos finais concretos, dentro desta cultura "maker" que define o proxecto "MIO". 

Ao longo da semana fomos aprendendo sobre o tema cunha serie de propostas do máis variadas:

• Comezamos cun "pecha-kucha" dunha selección de imaxes de Gregg Segal que serviríanos para reflexionar sobre os nosos propios hábitos alimentarios. Ademais, cada quen tomouse unha fotografía sobre o croma para sobrepoñela sobre as imaxes dos alimentos cos que nos identificamos.

• Ao día seguinte falamos sobre o nivel de procesamento dos alimentos baseándonos nun vídeo que grabaran fai uns cursos os rebuldeir@s sobre "Realfooders vs Fakefooders

• Traballamos coa aplicación YUKA e analizamos diferentes alimentos "con etiqueta" presentes no Mercado de Chispa e descubrimos que hai envases de produtos que parecen saudables e non o son. Polo que a nosa escolla ten que ser consciente xa desde o momento da compra. Analizamos, por tanto, o etiquetado e creamos os nosos envases de forma honesta.

• O mércores, os maiores estiveron analizando a pegada ecolóxica dos produtos que consumimos, empregando un montón de recursos en liña que podedes consultar premendo na seguinte imaxe, se sodes tan curiosas coma nós.

• 
  O xoves planificamos a nosa receita: calculamos cantidades dos ingredientes, estimamos os tempos de preparación, "fixemos a compra" no Mercado de Chispa e traballamos cos tickets, comprobamos as incompatibilidades coas intolerancias alimentarias, investigamos sobre as propiedades dos alimentos que leva cada prato... e tamén recollimos por escrito todo isto  para deixar constancia do proceso de elaboración da receita paso a paso.

• E o venres... tivo lugar unha feira de degustación dos petiscos saudables que cociñaron cada unha das aulas:
• Os peques de 3 e 4 anos fixeron "Brochetas de cores"

• Os peques de 5 anos elaboraron "Guacamole con sardiñas"

• @s rebuldeir@s cociñaron "Trufas de cacao e laranxa"

• Os tritóns de 3º de E.P. sorprendéronnos con "Mel-mazá"

• Os tritóns de 4º elaboraron unha laboriosa receita de "Trufas de Nadal"

• E os maiores, Q.S.U, deleitáronnos cunha "crema de avelás saudable"

Foi unha semana xenial na que aprendimos un montón! E non só de alimentación saudable, senón tamén de lingua, mates, e moitas cousas máis xa que tivemos que por en funcionamento as nosas habilidades e un sen fin de estratexias para resolver todas estas tarefas. Pensamos que isto dos "escenarios de aprendizaxe" veu para quedar... Xa estamos argallando o próximo...

25N: Escribimos NON desde a Biblioteca Escolar

Como cada 25N, desde a Biblioteca Escolar reivindicamos a loita contra a violencia de xénero, a través dun acto no que cada un de nós escribiu nun gran papel extendido no corredor das aulas todos eses xestos do día a día que non son máis que micromachismos que queremos que desaparecen. Negámonos a normalizar a violencia, de calquera tipo, e defendemos o bo trato para todas as persoas por igual.

Premendo nesta primeira foto, accedes ao álbum completo.

Despois sacamos o papel ao patio entre todas e todos e pisámolo como xesto de rexeitamento á violencia de xénero. Con forza, con rabia, con ansias de mudar o mundo. E rachamos con el, arelando rachar tamén co maltrato con sesgo de xénero.

Digamos NON á violencia de xénero

#espazODS_para_a_concienciACCIÓN

Encontro con Miguel Anxo Romero

Grazas á iniciativa do Concello de Ferrol en colaboración coa Editorial Embora, tivemos a sorte de contar coa presenza de Miguel Anxo Romero, autor dos textos do libro "Unha ollada a Viladoce", e que Leandro Lamas ilustrou tan fermosamente.

E contounos unha particularidade que fai deste libro unha peza singular, xa que foi xurdindo a través dos debuxos de Leandro e non ao revés, como adoita pasar normalmente. "Unha ollada a Viladoce" é un libro que vai fiando a historia a partir das súas ilustracións e non ao revés. Curioso, verdade?

Despois, fixemos unha actividade que consistía en crear unha especie de “libriño de cromos”, na que cada quen recibiu un folio con diversas ilustracións que servían como cromos. O obxectivo da

actividade era intercambiarse os cromos para conseguir todos e pegalos nas páxinas correspondentes. E unha vez completado o álbum de cromos, éste danos pe a facer un obradoiro de escritura creativa, fiando a través da nosa propia historia, as diferentes imaxes, como fixo o propio Miguel Anxo Romero. A verdade é que gozamos moito deste proceso creativo. 

E para rematar a visita, agasallou a todo o alumnado de 3º e 4º de Primaria cun exemplar, asinou no libro de visitas e adicounos o seu libro "Unha ollada a Viladoce" que pasará a formar parte dos nosos fondos e que de seguida poderá ser emprestado. A que tedes moita curiosidade por saber máis?

Grazas pola sesión creativa tan agradable na nosa Biblioteca!

Samaín 2022: Contos de medo e moitas cousas máis

É hora de poñerse a tremer, porque xa están aquí os contos de medo... escritos, ilustrados, guionizados e gravados por todo o alumnado do cole. Cómo gozamos con esta celebración na que se misturan feitizos, personaxes escuras e historias arrepiantes! 

E ademais forma parte da nosa tradición: Os nosos devanceiros xa contaban ao redor do lume historias que achegan o descoñecido e o misterioso ao noso mundo, no que á luz das candeas no interior das cabazas espantaban o medo, falando del.

Por iso, este venres fixemos un desfile cos nosos calacús acesos ata á biblioteca, e unha vez reunidos á luz das candeas contamos os nosos xa tradicionais contos de medo. Estades preparados????

Comezaron os peques de 3 e 4 anos, que contaron unha increíble historia que durou unha semana enteira e que nos deixou a todos coa boca aberta!

Logo, foi a quenda dos peques de 5 anos, que recrearon unha historia que ben puido suceder no estaleiro de Navantia e que Iago e Loaira contaron para todos e todas á perfección.

Despois, tocoulles aos rebuldeir@s, cos que trememos de medo coa fantástica historia de "O leite poderoso!" en versión audiovisual. Menudos actorazos que temos neste cole!!!

E máis contos de medo dos de 3º... e máis contos de medo dos de 4º... Brrrrrrrrr! Danme arrepíos só de lembrarme....

Para rematar a sesión coa sinistra historia "Samaín tebroso" narrada polos maiores do cole, que tamén recolleron en formato audiovisual.

Pero non rematou aquí o día, senon todo o contrario. Isto acaba de comezar! Preparamos un gran xogo no que participamos todo o cole, en equipos heteroxéneos, como antes da pandemia! Seis estacións con propostas do máis diversas polas que fomos pasando ao longo da mañá, seguindo un itinerario, para pasalo de medo.

(preme nesta imaxe para acceder ao álbum completo das fotos)

Retratos no croma

(E preme nesta imaxe para acceder ao álbum completo da Galería de Retratos de Medo)

Colares de zonchos

Manualidades Terroríficas

Xogo de pistas na Biblio

Move o esquelete

e Xogos Populares para o Samaín

Unha mañá moi intensa, pero na que tiñamos aínda moito que celebrar. Porque xa sabedes que sempre aproveitamos o Samaín para celebrar o Magosto. Grazas á colaboración de todas as familias, e especialmente ás familias da nosa ANPA molona puidemos degustar unhas castañas asadas das que demos boa conta no recreo.

Hummmm! Deliciosas!!!

E despois, xogos e fotos... mooooitas fotos.

Que ben o pasamos! 

Xa está tardando que pase un ano para voltar a repetilo.