A MIÑA PRIMEIRA ROSALÍA en concerto, no TEATRO JOFRE

Onte asistimos á presentación do LIBRO-DISCO, "A miña primeira Rosalía". Unha vez máis Xosé Lastra e Xiana Lastra fan realidade un proxecto deste tipo. ¿Recordades "O meu primeiro Celso Emilio"? Un libro ilustrado pola artista María Manuela, quen tamén canta xunto a Mini e Mero, e á propia Xiana. De novo gozamos coa súa música e pasamos un tempo marabilloso cos versos de Rosalía de Castro.

Pola nosa banda, adicamos boa parte da mañá a recordar os poemas de Rosalía e a cantar algunhas das cantigas que recordabamos do curso pasado. O mural que fixemos aínda adorna a parede da nosa BIBLIOTECA.

Despois chegou a hora e a media mañá collemos o autobús para chegar ás doce ao Teatro Jofre. Fixemos unhas cantas fotos que queremos que vexades; á chegada, durante o concerto, e con María Manuela, Xiana, Manolo e Xurxo, logo de remataren.

Ficha do libro. E más información no Blog de Xerais,   A Voz de Galicia, Facebook

"O MEU PRIMEIRO CELSO EMILIO" NO JOFRE

O grupo de 5º e 6º con Xiana Lastra

Autores: Xiana e Xosé Lastra

O pasado día 16 de novembro asistimos no Jofre, e invitados polo Concello de Ferrol, ao concerto "O meu primeiro Celso Emilio". Unha magnífica presentación do libro-disco ilustrado por María Manuela e editado por Xerais, onde se combinou a música e os seus poemas con pequenas curtas audiovisuais que percorreron os momentos máis importantes da vida do poeta.

O proxecto reúne a un importante elenco de artistas; algunhas das voces cunha sólida traxectoria, coma María Manuela, Mini e Mero, a quen ver aparecer no escenario produce unha lene hipnose ; e Xiana, que nos cativou con ese "Agardarei". Mmmm... Felicitacións a todos eles; e aos músicos, moitos, amigos: Xurxo Varela, Pablo, Manolo, Paco Barreiro (Dangarandán. 16 pezas tradicionais galegas arranxadas para guitarra)... Foi todo un agasallo para os nosos oídos e para a nosa alma.

O libro sairá nas recomendacións de Nadal da nosa Biblioteca porque lelo e escoitalo é todo un pracer. 

No centenario do nacemento de Celso Emilio: 

"O meu primeiro Celso Emilio"

¿Queredes ver o booktrailer?

"O meu primeiro Celso Emilio" from Seispés Producións Creativas on Vimeo.

O vindeiro 12 de decembro a media mañá, é dicir o 12 do 12 do 12 ás 12 h. o alumnado do 3º ciclo participará na actividade promovida pola Coordinadora Galega de Equipos de Normalización e Dinamización Lingüística: RecitandoCelsoemiliO. E este "O meu primeiro Celso Emilio" serviunos para facer unha selección dos poemas a recitar:

POEMA EN SILENZO: 

-Dorna feituca do berce

a navigar polo ceo...

-Chsss

                         Silenzo,

que vai espertar o neno.

CANCIÓN:

O vello cantaba

unha lembranza.

O mozo cantaba 

unha esperanza.

O neno cantaba

unha louvanza.

Pobo meu: pois que cantas,

érguete i anda.

VIAXE AO PAÍS DOS ANANOS

Teño o corazón senlleiro

e orfo na noite fría.

Non importa, agardarei

polo albor do novo día.

Teño lobos, teño sombras, 

teño a sorte fuxidía.

Non importa, agardarei

polo albor do novo día.

Está mudo o reixiñol

que outrora cantar solía.

Non importa, agardarei

polo albor do novo día.

Que está comigo a esperanza,

fiando, fía que fía...

Ela fía e eu confío

no albor do novo día.

Recitaremos estes tres poemas xunto con "Deitado frente ao mar"