LEANDRO LAMAS - Un obradoiro con moita arte

Dentro das actividades enmarcadas na celebración das LETRAS GALEGAS, onte tivemos a sorte de contar con Leandro para facer dous obradoiros de ilustración. Primeiro cos peques de Infantil e 1º e 2º, na aula dos Rebuldeiros. Despois, na Biblioteca, 3º, 4º, 5º e 6º. 

Pasiño a pasiño os nenos e nenas foron descubrindo que eran quen de crear a súa propia ilustración; para iso, nada coma un artista coma Leandro que os axudou no proceso con humor, paciencia e bo facer.

MOITAS GRAZAS POLA TÚA VISITA

E GRAZAS Á ANPA QUE A FIXO POSIBLE!

PITUSA SEMIFUSA

Ilustración de Leandro Lamas, tirada da súa páxina de Facebook

 

Ilustración do Cd

Para celebrar o Día Mundial do Libro, a Editorial Galaxia saca o Libro con Cd "Pitusa Semifusa".

"Pitusa Semifusa é un mollo de cancións de Olga Brañas protagonizadas por unha nena dese mesmo nome, neta dunha famosa directora de orquestra e que, logo de herdar dela un gramófono, sinte curiosidade por coñecer todas as familias de instrumentos. Ao longo das distintas cancións, nas que participan as voces e os músicos máis importantes de Galicia, Pitusa Semifusa irá avanzando polos pentagramas de todos os instrumentos, de tal xeito que a medida que van avanzando os temas, se van incorporando máis e máis ata rematar nunha completa Festa Musical." (Fonte: Galaxia)

¡Noraboa a Olga polas fermosas cancións; a Leandro, porque as túas ilustracións son sempre un agasallo de cor; e a todos e todas os que participastes e fixestes posible este proxecto ...

; )

¡Xa nos ten conquistado o corazón! 

Máis no blog da Editorial Galaxia 

CANDO MARTIÑO TIVO GANAS DE MEXAR NA NOITE DE REIS. Contacontos

Ilustración do libro de Kiko da Silva

Como sabedes, este é xa un conto case-clásico dentro da  literatura recente. Ten tanto éxito que a profe Rosana non se puido resistir e onte, contouno na hora do recreo.: "CANDO MARTIÑO TIVO GANAS DE MEXAR NA NOITE DE REIS". Un conto de Chema Heras, ilustrado por Kiko da Silva, da Editorial Kalandraka.

Martiño ten serios problemas esa noite máxica, pero sabe que non se debe erguer da cama se quere que os Reis Magos visiten a súa casa...

Se queredes recordar uuuuun pouco este libro, vede este comezo...

Recensión na Revista Babar.
Coma sempre, as preguntas do concurso preparadas para ser contestadas:  

 ¡Espero que teñades moita sorte, participantes!

O APALPADOR: ¿Con cal te quedas?

"O Apalpador" de Leandro Lamas

"O Apalpador" de Francisco Ameixeiras Sánchez

"O Apalpador" de M. Cráneo

"O Apalpador"  de ? (i478.photobucket.com)

"O Apalpador" de  ? (agal-gz.org)

"O Apalpador" de Xoán G.

Como algúns saberedes, este é o segundo ano no que as cartas ao Apalpador poden levar un premio. Se queredes concursar, entrade no enlace "Premio Cartas ao Apalpador 2013".

Animádevos a facelo de xeito individual ou enleando ao voso grupo de clase. Fixádevos ben nas bases e  ¡BOA SORTE!

Por certo, a EXPOSICIÓN DE LIBROS DE NADAL ESTÁ A PUNTO, nela poderedes atopar, entre outros, os libros do Apalpador que temos na Biblio.

CONTACONTOS: "UNA NUBE"

Marta, Laura (detrás), Gaia, Iria e Lía

Xa me tardaba escribir esta entrada, pero xa sabiades que faltaba, ¿a que si? O pasado domingo aparecía o anuncio neste blog.

Pois ben, o venres, un pouquiño despois de comezar o recreo tiñamos na biblio un numeroso público desexando escoitar a Lía, Iria, Gaia, Laura e Marta, as valerosas contacontos de primeiro, que ademais o fixeron de marabilla. ¿Xa sabedes cal foi o conto que nos leron? Leron "Una nube", de Daniel Nesquens, coas ilustracións de Elisa Arguilé. Pertence á colección "MI PRIMERA SOPA DE LIBROS" da Ed. Anaya. Escolleron este libro tan sinxeliño para que os nenos pequenos o puidesen entender moooi ben e para que non nos pillase o "timbre" do recreo, que sempre nos fai dar un chimpo.
Por certo, prepararon os debuxos do libro, que querían repartir. É unha pena que as copias teñan que ser en branco e negro porque, vede que bonitos son os orixinais. Dos debuxos de Gaia non temos copia porque xa os trouxo ela feitos todos, todos no último momento... Pero podedes velos nas fotos: un montón de nubes e flores de cores. Todos eles, fermosos. Sodes unhas campionas.

¡MOITAS FELICIDADES! 

Estades invitadas a facer outro cando queirades. 

¡Un bico de Chispa!

Aquí podedes ver as fotos do venres:

Por certo, buscando e buscando información para podervos ensinar, atopamos NESQUENSMANIA. se vos apetece saber de que se trata, entrade, entrade.
E tamén atopamos información extra: Entrevista a Elisa Arguilé na Revista Babar
"Y tú ¿cómo te llamas?", en vídeo, de Daniel Nesquens e ilustrado por Elisa Arguilé.

CONTACONTOS "A XACIA LUVIÑAS"

Tal e como anunciamos o mércores, este venres tivemos contacontos no recreo, e ademais con melloras!! Aitana tivo a Sonia de colaboradora; ¡entre dúas mellor! Prepararon unha fermosa e pequerrecha xacia Luviñas, copiada da ilustración que tanto nos gustou de Cristina Ouro, para entregar como recordo aos nenos e nenas que quixeron escoitar este fermoso conto no que  Anxo Moure anima a coidar os ríos, os bosques e a parar as guerras. Pois si que facemos esas reflexións na escola moi a miúdo, a que si?
A sesión, como cabía esperar, rematou cun montón de cariciñas e apertas, e cos recordos que Sonia e Aitana repartiron.

Grazas ás dúas pola vosa colaboración. Cando queirades, máis!

¡E grazas a Anxo e Cristina por imaxinalo!