Un ano máis cómpre, no Día Mundial para a concienciación sobre o Autismo, visibilizar a diversidade das persoas como un valor da sociedade.
Nós sabémolo moi ben, porque fomentamos o respecto á diversidade na nosa escola o que axudará a que as persoas autistas - e calquera outra - poida gozar das mesmas oportunidades que as demais.
Baixo o lema deste ano #chamémolopoloseunome, preténdese desterrar falsos mitos e ideas erradas sobre o autismo e dar a coñecer a especificidade e a valía das persoas con TEA, impulsando deste modo o compromiso de toda a cidadanía nesta tarefa. Podedes ler aquí o MANIFESTO da Confederación de Autismo España.
Para tentar entender máis aos nenos e nenas con TEA, realizamos varias actividades como unha dinámica relacionada con distintas formas de comunicarse a través da expresión escrita ou o visionado dunha curtometraxe moi interesante que nos ensinou a entender un pouco máis como perciben o mundo as persoas con TEA e como con vontade e paciencia podemos entendernos e comunicarnos.
O grupo dos Rebuldeir@s traballaron co conto "TEA", de Alejandra González, editado por Pintacola Ediciones, que ofrece unha experiencia inmersiva que nos fará empatizar coas persoas que teñen TEA. Grazas ás gafas vermellas e azuis, poden vivenciar unha dobre experiencia sobre o mesmo relato, coñecer as principais alteracións que presentan as persoas con autismo e obterán as claves que facilitan a presencia, participación e aprendizaxe destes nenos e nenas nas aulas, no recreo, no parque... xa que todos eles poden facer o mesmo que os seus compañeiros se contan cos apoios e axustes do seu entorno precisos.
E falando sobre isto, démonos conta que as cousas que nos fan felices son practicamente as mesmas para todas as persoas, teñan TEA ou non. Para comprobalo, aquí vos deixamos cos vídeos que gravamos durante esta semana para tomar conciencia sobre o autismo, xa que todos temos en común moitas máis cousas das que pensamos: os amigos, a familia, as mascotas, a praia, a escola...
Baixo o lema “Podo aprender. Podo trabajar”, a campaña do Día Mundial de Concienciación sobre el Autismo 2020-2021 pon o foco na educación e no emprego, dous ámbitos fundamentais para mellorar a calidade de vida das persoas con TEA e acadar a súa participación efectiva na sociedade.
As personas con TEA teñen dereito a acceder a unha educación de calidade que promova o seu éxito académico e o seu desenvolvemento persoal, pero que tamén facilite o seu acceso ao mercado laboral, atendendo para iso ás capacidades e necesidades especídicas de cada unha delas.
.png)
