Amosando publicacións coa etiqueta Arqueoloxía. Amosar todas as publicacións
Amosando publicacións coa etiqueta Arqueoloxía. Amosar todas as publicacións

venres, 15 de marzo de 2024

Visita ao Monumento aos represaliados e arqueódromo no Centro Cultural Torrente Ballester

Hoxe, o alumnado de 5º e 6º de Primaria, realizou unha dobre visita, aproveitando que nos desprazábamos ao centro da cidade. 

A primeira hora, visitaron o monumento memorial ás vítimas do franquismo. Dentro do noso traballo de investigación sobre García Niebla, era unha visita indespensable. Alí está o seu nome e o de centos de persoas máis que entre 1936 e 1975, tal e como se indica na mesma base do monumento, foron vítimas mortais do réxime franquista, só na zona do Eume, Ortegal e Ferrolterra. 

Preme nesta fotografía se queres ver algunha imaxe máis.


Aproveiramos tamén para visitar o Centro Cultural Torrente Ballester, que alberga unha exposición que leva por título "Orixes II" sobre o Castro de Tralocastro, en Esmelle, na que Lucía fixo de guía de forma excepcional.






Posteriormente Lucía acompañounos ao "arqueódromo", onde puidemos sentirnos coma auténticos arqueólogas e arqueólogos descubrindo distintas pezas que por último datamos utilizando un catálogo para comprobar a que etapa pertencían: etapa castrexa, galaico romana, etc.








Foi unha experiencia moi interesante, ben estruturada e ben formulada. Gustounos un montón. E houbo quen xa se  apuntou a visitar a excavación real cando empece a segunda campaña este verán. 

E nesta última imaxe tedes acceso ao álbum coas imaxes da segunda parte da visita.


Grazas, Lucía por esta mañá tan interesante!

luns, 3 de decembro de 2018

ÓSCAR PICOS COS REBULDEIROS - Novo encontro coa ARQUEOLOXÍA

https://photos.app.goo.gl/tHWQoiW2i4MHCLQTA


O venres 30 de novembro foi un día moi intenso para os Rebuldeiros. A de cousas que aprenderon!! Ampliaron os seus coñecementos sobre o proxecto de arqueoloxía no que están inmersos, e todo grazas a Óscar Picos, que estivo toda a xornada do venres cos Rebuldeiros. Queredes saber exactamente que aprenderon? Pois continuade lendo, merece a pena ;)
Comezou a mañá, e Óscar explicoulles de onde procede o ouro e a diferenza deste mineral coa pirita. Este último é tamén un mineral que se asemella ao ouro. Hoxe en día coñécese co nome de  “o ouro dos tontos”. Tamén nos falou da calcopirita, outro mineral co que se pode confundir o ouro.
Se queredes afondar máis sobre a orixe do ouro, aquí vos deixamos o enlace a un artigo (preme na cabeceira), e un vídeo que vos poden interesar:

https://www.abc.es/ciencia/abci-descubren-origen-todo-y-plata-tierra-201605241016_noticia.html

Posteriormente, Óscar mostroulles distintos fósiles dalgunhas eras xeolóxicas. Dentro da Era Paleozoica, puideron ver e tocar fósiles do período Cámbrico, Devónico ou Carbonífero: fósiles de trilobites, belemnites ou amonite, fósiles de felgos... entre outros. Dentro da Era Mesozoica, viron fósiles do período Xurásico e Cretácico.
Tamén puideron ver e observar a través dun microscopio binocular formigas e escaravellos prehistóricos e térmites fosilizados. Estaban en ámbar, que é unha resina fosilizada.
Logo dos fósiles Óscar explicoulles aos Rebuldeiros a evolución das ferramentas. Comezaron na Idade de Pedra, que é o período da prehistoria que abrangue dende que os seres humanos comezaron a elaborar ferramentas de pedra ata o descubrimento e uso dos metais. A continuación mergulláronse na Idade dos Metais, onde Óscar ensinoulles algunhas ferramentas ou utensilios da época romana: sondas médicas, agullas, tesoiras, anzois, decoración de roupa (como fíbulas e botóns)... ata moedas!! (Todo de bronce). Aparte de ferramentas, puideron ver cerámicas da época castrense.
E por se fose pouco, por último os Rebuldeiros foron... "BATEADORES" DE OURO!!
"Batear" é empregar un recipiente plano, en forma de prato fondo, para lavar as areas separando a grava e area e quedándonos cos materiais máis pesados, como é o caso do ouro.
Óscar facilitoulles moito a tarefa e xa tiña para cada Rebuldeiro a súa bolsiña de grava con ouro. Eles tiveron que baleirar cada bolsa na batea, somerxer a batea na auga para, a continuación, eliminar coa man aquelas rochas de maior tamaño. Ao somerxer a batea lógrase que os materiais máis pesados (coma o ouro) descendan ata o fondo da mesma.
O seguinte paso foi coller a batea con ambas mans e realizar un movemento. Pode ser circular ou dun lado cara o outro... A finalidade é que con este movemento os materiais máis pesados se queden no fondo da batea e o resto de materiais, que son máis lixeiros, estén en suspensión e poder baleiralos da batea. Para iso temos que inclinar lixeiramente a batea e deixalos saír por riba do seu bordo. Este é un proceso que hai que repetir ata que no fondo da batea quede unha area negra, que é un conxunto de óxidos metálicos. Nesta fase xa é posible ver entre a area negra, o ouro.
Os Rebuldeiros déronse conta de que non é tan doado isto de batear. Para outra próxima vez esperamos poder ter a oportunidade de practicar o bateo nun recuncho tranquilo dun río, sería fantástico! Pero mentres tanto... conformarémonos co realizado no cole!
Agradecer, de novo, a Óscar por todo o esforzo de traer o material ao cole, pola paciencia que tivo cos nosos Rebuldeiros, e poder deixarlles manipular tan valiosísimos fósiles, ferramentas e minerais. Por último, mencionar ao grupo ao que pertence Óscar chamado Gold Diggers, polo seu marabilloso traballo!

mércores, 28 de novembro de 2018

UN EXPERTO NA CLASE. De novo, ARQUEÓLOGOS POR UN DÍA!

https://photos.app.goo.gl/MXbfFBHv6rzXF4LH7
Onte, os Rebuldeiros recibimos a visita do profesor da UNED, Marcial Tenreiro Bemúdez. O seu traballo como arqueólogo serviunos para ampliar todo o que estamos aprendendo estes días co Proxecto de arqueoloxía.
Fixémoslle moitas preguntas. Queriamos saber porque escolleu esa carreira, e el contestounos que foi un pouco de casualidade xa que de pequeno gustáballe escapar, e buscar e atopar obxectos valiosos...
Preguntámoslle polo valor dos obxectos que se encontran nas excavacións, e el contounos que a verdadeira importancia non está  nos obxectos en si, senón en toda a historia que os envolve. Grazas a eles sabemos a historia das persoas que os utilizaban, o que comían, como vestían, a que adicaban o seu tempo... Por exemplo, unha anécdota: Explicounos que está documentado arqueolóxicamente que hai 5000 anos en Galicia xa se comía caldo de verzas con castañas. E como se sabe iso? Pois porque se atopou un potiño de barro no interior dunha mámoa que o contiña. Seguro que o seu contido caducara, non si? Despois de tanto tempo non poderiamos comelo, haaa, haa! Pero o certo é que, grazas a ese achado, puidemos coñecer parte da alimentación dos nosos antepasados. Interesante, eh?
A Marcial preguntámoslle tamén se el fixo algún descubrimento valioso, e claro que atopou moitas cousas, pero destacou un botón de cobre, oito pulseiras e un ánfora que contiña uns pos rosados cos que as mulleres se maquillaban hai 2000 anos. Maquillaxe!!!! E outro achado importante foi o dun grupo de 150 pedaciños de cerámica nun só día!!!! Incrible! Non credes? Imaxinades se vos ocorrese iso??
Explicounos tamén que para levar a cabo unha excavación hai que pedir os permisos necesarios e documentar todo o que pasa mentres dura o proceso, rematando cunha memoria na que se detallan os achados. E se non se atopa nada? Pois tamén hai que recollelo. 
As pezas que se descobren pasan a un almacén; e de alí, a un museo que se encarga da súa restauración e conservación. E é que os museos no só amosan os achados, senón que teñen un papel fundamental na conservación do patrimonio. Se cadra iso non é tan visible, pero sen ese labor podería desaparacer gran parte da nosa historia.
Así que xa sabedes, o importante é traballar minuciosamente, con paciencia e rigurosidade; e seguindo uns pasos que xa vos empezan a ser familiares.
ISTO PROMETE! CANTAS ARQUEÓLOGAS SAIRÁN DESTA CLASE? ALGÚN ARQUEÓLOGO? 
HABERÁ QUE ESPERAR UN TEMPIÑO, PERO NON MOITO; NON VAIADES PENSAR!! 
Marcial, grazas pola túa interesante visita;
non sempre nos entra un arqueólogo de verdade pola porta ; )

mércores, 21 de novembro de 2018

ARQUEÓLOGOS POR UN DÍA..., e máis que virá!

https://photos.app.goo.gl/HsVqFx1UxRAiKMHw7

https://photos.app.goo.gl/HsVqFx1UxRAiKMHw7
Esta mañá os pequenos e pequenas de 1º e 2º, os Rebuldeiros, fixeron unha exposición na súa aula sobre o proxecto no que están traballando: A ARQUEOLOXÍA. Escoitaron e participaron  con moitas ganas os seus compañeiros e compañeiras de Infantil. A verdade é que as explicacións foron moi clariñas e sabemos que este tema vai dar moito de sí. De momento, a profe Kelly conseguiu que despois do recreo vivisen unha aventura en primeira persoa, xa que logo da exposición, localizaron no plano do cole, onde buscar e, mans á obra!; repartiron as ferramentas de traballo e cavaron ata atopar todos os "tesouros": unhas misteriosas pedras que agochaban o verdadeiro tesouro. Cada unha delas tiña dentro unha antiga moeda que levaron como recordo para a súa casa! Buá!, vaia mañá!!
Avisamos que aínda haberá máis sorpresas! 
Estade atentos!