Amosando publicacións coa etiqueta Mulleres. Amosar todas as publicacións
Amosando publicacións coa etiqueta Mulleres. Amosar todas as publicacións

xoves, 7 de marzo de 2024

Visita de Laura Castro, investigadora do CITENI

Hoxe tivemos a sorte de que viñera a visitarnos Laura Castro, enxeñeira industrial experta en enerxías renovables mariñas, profesora na EPEF da UDC e investigadora do CITENI, quen foi recoñecida pola Universidade de Standford como unha das persoas investigadoras máis influintes no seu campo. Quixemos contar con ela xa o mes pasado, polo Día da Nena e a Muller na ciencia, mais por motivos de axenda, tivemos que adiar a visita ao mes de marzo, na véspera do Día da Muller Traballadora. A verdade é que calquera data serve para visibilizar referentes femininos en calquera dos ámbitos da cultura, a ciencia ou as artes, porque somos moitas e cada vez máis presentes.

Os rebuldeir@s tiñan preparados uns experimentos sobre a flotación e a xeración de enerxía coa forza da auga e quixeron amosarlle a Laura os avances nas súas investigacións. Aproveitamos tamén para ver estes experimentos os peques do cole, que están inmersos no proceso de creación de máquinas simples e outros procesos.


Despois, xa na biblio, Laura contounos un montón de cousas sobre ela mesma e como foi que se fixo investigadora. Falounos das súas experiencias vitais e como estas influíron na súa carreira profesional ata chegar a converterse en docente e investigadora.

Ademais, os peques - Mara, Iker, Irene e Julietta -  lle tiñan preparada unha pequena entrevista, así que aproveitamos para subir á radio a grabar unha pequena entrevista que prepararon con moita ilusión. Podédela escoitar aquí.

Despois Laura xuntouse de novo na biblio, desta vez cos maiores do cole, de  3º a 6º de Primaria, nunha sesión na que tivo que respostar a moitísimas preguntas, xa que o alumnado tiña moito interese sobre o seu campo de investigación, a enxeñería eólica mariña.

Podes premer en calquera fotografía para acceder ao álbum con todas as imaxes.

Moitísimas grazas por vir visitarnos para falar de ti e o teu traballo. Porque como ben dixeches, é fundamental visibilizar ás mulleres en todos os ámbitos. Sen dúbida es un referente para moitas de nós. 


mércores, 8 de marzo de 2023

IV Minimaratón Kathrine Switzer

Un ano máis, e xa van catro, o 8 de marzo, Día da Muller, celebramos a nosa particular edición do Maratón Kathrine Switzer como un xeito de visibilización da loita das mulleres para lograr a igualdade plena de dereitos en todos os ámbitos.

Se premes nesta fotografía, accedes ás fotos que nos sacou Rebeca, de Mirada de Madrina.

Organizamos esta carreira simbólica na honra de primeira muller que logrou correr unha maratón con dorsal, no Boston de 1967 e que grazas ao seu esforzo logrou que cinco anos máis tarde permitírase a inscripción de calquera muller nesta proba deportiva, ata entón vetada para elas.


Cando miramos as imaxes do que aconteceu aquel día parécennos ciencia ficción, mais hai non tantas décadas a discriminación da muller en moitos ámbitos da vida estaba normalizada. Grazas a mulleres teimudas coma ela que loitaron por conseguir un mundo máis xusto, hoxe vivimos nun mundo máis igualitario.


Esta foto é de Rebeca del Río, pero se premes nela accedes ao álbum completo das fotos da cámara do cole, que aínda que se fan con moito cariño, non teñen a mesma calidade nin de lonxe.

Este ano tivemos que realizar a carreira no interior do centro por mor do mal tempo, pero aínda así abrimos as portas ás familias, que se achegaron para compartir con nós esta gran festa do feminismo, da igualdade e do deporte. Deixámosvos con algunhas imaxes da carreira para que os que non puidestes achegarvos ao cole, a gocedes tanto como o fixemos nós.

Peques de 3 anos
Peques de 4 anos
Peques de 5 anos
Rebuldeir@s de1º de EP
Rebuldeir@s de 2º de EP
Tritóns de 3º de EP
Tritóns de 4º de EP

Q.S.U.
E profes e familias.

E logo tocou a entrega de medallas, desta volta feitas na impresora 3D da nosa biblio: moradas e coa nosa Chispa ben presente. Unha chulada, verdade?

E aquí tedes os grandes protagonistas deste día!!!









Grazas a todas e a todos por vir e participar. 
Especial agradecemento a Rebeca del Río que un ano máis, cámara en man, saca sempre o mellor de cada instante. Menuda crack!

E velaiquí tedes o vídeo-resumo da xornada.


E o ano que vén? O ano que vén máis e mellor. 
Imos a polo V Minimaratón Kathrine Switzer!

luns, 28 de novembro de 2022

Deporte en igualdade

Moita Copa do Mundo estes días, pero... a calidade atópase en Pazos!

Hoxe tivemos unha visita moi especial, xa que ter FUTBOLISTAS PROFESIONAIS polo noso cole non é cousa de todos os días! Pero si, Luin, Carolina, Carol e Laura, xogadoras do VALDETIRES FUTBOL SALA de Ferrol viñeron para axudarnos a coñecer un pouco máis este deporte, contarnos como é o día a día dunha xogadora profesional, os sacrificios que iso supón, as viaxes, os adestramentos, consellos sobre a vida deportiva, consellos cos estudos, os beneficios dunha alimentación sa e da práctica deportiva... E ata puidemos xogar con elas uns partidiños!!




Que ben o pasamos e canto aprendemos todas xuntas xogando e escoitando as súas experiencias. Sen dúbida, unha xornada para repetir! Grazas a Aurora por axudarnos a organizar a actividade e ás xogadoras do Valedetires pola visita e o seu trato exquisito con todas nós, sodes moi cracks!


Pazos sempre co deporte en igualdade!

#espazODS_para_a_concienciACCIÓN



venres, 5 de novembro de 2021

#NoMoreMatildas

Imaxinas que tería pasado se Eintein nacera muller? Pois que probablemente hoxe non saberíamos quen é Einstein. E é que os méritos dos seus descubrimentos os tería levado algún compañeiro de investigación... ou incluso a súa parella.


Este fenómeno, coñecido como Efecto Matilda na honra a Matilda Joslyn Gage, a primeira activista en denuncialo, sinala a inxustiza de ignorar, de forma sistemática, os hachados de brillantes científicas ao longo da historia.

A falta de referentes feminimos ten un impacto nas aspiracións profesionais das nenas que se traduce nunha menor presencia destas nas carreiras STEM.

A campaña #NoMoreMatildas quere recuperar estas figuras, levándoas aos libros de texto para que esperten co seu exemplo, os seus hachados e as súas aportacións, a vocación científica de todas esas nenas ás que ata hoxe, fíxoelles pensar que a ciencia era cousa de homes.



Se queres saber máis sobre o papel que xogaron as mulleres na ciencia ao longo da historia, podes descargarte o anexo sobre mulleres científicas para Primaria, premendo na imaxe a continuación.

E desde aquí, podedes acceder aos tres títulos da colección da Asociación de Mulleres Investigadoras e Tecnólogas (AMIT), que polo momento están agotados e só podemos acceder a eles en formato dixital.



Por un mundo mellor, #NoMoreMatildas.

"esPazODS para a concienciACCIÓN"


martes, 18 de maio de 2021

Unha pegada con estrela e nome propio.

Recordades alá polo mes de marzo, mes da muller, todo o que aprendimos sobre as pegadas que deixaron 64 mulleres galegas? Lembrades aquel xogo no que tiñamos que escanear os códigos QR para averiguar onde xeolocalizalas? Como esquecerse, verdade? 

Vale, pois se andas algo despistado podes premer aquí para ver cómo foi.

O caso é que puxémonos a investigar por todas partes para decidir que mulleres escoller para levar a cabo o xogo, e ao principio parecía case misión imposible atopar 64 mulleres que ademáis foran galegas... Tantos anos invisibilizándoas, que de primeiras custa un pouco encontrar esos referentes en feminino, e ademáis, galegas... Mais cando comezas a investigar un pouco, da para facer un xogo novo con outras tantas!!!

É que as mulleres xogaron un papel fundamental ao longo da historia, tan importante como os homes, claro que si! 

Nesta selección de mulleres aparecen referentes clásicos, coma Rosalía de Castro, Emilia Pardo Bazán, Concepción Arenal, Sofía Casanova, ... e outras máis contemporáneas, como Ángeles Alvariño, Maruja Mallo, María Mariño, ... e incluso actualísimas como Guadi Galego, Margarita Ledo-Andión, Yolanda Díaz... e ata deportistas da talla de Vero Boquete, Belén Toimil ou Chus Lago...

E mirade como son as cousas que tanto buscamos, tanto buscamos que esquecímonos de mirar a quen tiñamos ao lado. 

Así que a ela adicámoslle a pegada número 65. Seguro que así, disculparanos. 


E agora estarédevos preguntando para quen é esta estrela, verdade?

Pois vémola todos os días e non a valoramos!

Claudia Paola Rodríguez Teijeiro

que ademáis de ser a profe dos Tritóns do cole de Pazos, foi xogadora profesional de FutSal Femenino na primeira división deste deporte, durante 10 anos co CS Burela FS.

Campioa de Primera División na tempada 2015/2016;
Campioa da Supercopa de España no 2015;
Campioa coa Selección Galega no 1998, 2004, 2006 e 2008
e Campioa na Copa Xunta de Galicia no 2005, 2007, 2009 e 2010.
Preme na foto se queres saber máis.

Por moitas máis coma ti!

luns, 17 de maio de 2021

Letras Galegas 2021: Xela Arias

Xela Arias Castaño, foi escritora, editora, tradutora e profesora de Lingua e Literatura. De nena estudou na granxa Barreiros, un proxecto pedagóxico innovador e no Colexio Fingoi. Máis tarde mudouse a Vigo por mor do traballo do seu pai, que era mestre. Alí desenvolvería a súa vida persoal e profesional.

Aos 18 anos comezou a traballar en Edicións Xerais de Galicia, pasando de oficinista a editora e correctora. Compaxina este traballo con diversas colaboracións en publicacións como A Nosa Terra, Diario 16 de Galicia ou Faro de Vigo.

Xela foi unha muller comprometida, ecoloxista e feminista. Participou en movementos culturais como a Festa da Palabra Silenciada, revista cultural producida por Feministas Independentes Galegas, ou en Burla Negra, contra o desastre do Prestige.

Entre as súas obras destacan Tigres coma cabalos e Darío a diario. Publica Intempériome no ano 2003, ano do seu inesperado falecemento. Este ano, vense de publicar como obra póstuma Non te amola!, única obra narrativa escrita a principios dos 90 na que se retrotrae á súa nenez.

Durante toda a semana pasada estivemos traballando sobre a biografía da homenaxeada. Como cada ano, escollemos oito momentos destacados da súa vida e ilustrámonos. Entre todos e todas compoñemos o mural que está na entrada do colexio.


Ademáis este ano fixemos colaborativamente a representación da súa imaxe, pois formará parte da colección de "Mulleres nas Letras", pois son xa 5 mulleres as homenaxeadas no Día das Letras Galegas:
Rosalía de Castro
Francisca Herrera
María Mariño
María Victoria Moreno
e agora, Xela Arias.

Pero queredes saber máis cousas sobre ela, verdade? Pois por aquí quedan unha chea de recursos cos que traballar ao longo desta semana nas aulas xa que, como moitos saberedes, ímolo celebrar o vindeiro venres 21 por todo o alto. 

- Biografías -


 


- Recursos na rede -

Genially para todos os niveis da man de Burbullas de PT

Genially de Noemí García e Belén Martín Franco

Genially de Alba Carril e Ana Sánchez Sanmartín


- E máis e máis materiais para traballar a vida e a obra de Xela Arias -

"A palabra esgazada", na RAG

UD na web de "Mulleres Galegas"

Exposición "Aquela nena de Sarria"

No portal "Primavera das Letras"

Na web do "Seminario Galán"

No "Portal da Lingua Galega"


E para rematar, un pouco de música da man de A Banda da Loba.


A gozar no Día das Letras Galegas e que veñan mil primaveras máis para a nosa lingua.