Amosando publicacións coa etiqueta Club de Lectura. Amosar todas as publicacións
Amosando publicacións coa etiqueta Club de Lectura. Amosar todas as publicacións

venres, 17 de xaneiro de 2025

CLUB DE LECTURA: A MÁQUINA DE FACER CONTOS

  

Onte celebramos a segunda reunión do Club de Lectura de Chispa. Durante o mes de Decembro estivemos lendo A Máquina de facer contos, novela de Ricardo Gómez, ilustrada por Emilio Urberuaga. 

A novela suscitou diferentes opinións entre os participantes do club, pero deu lugar á introdución e coloquio dun tópico moi actual nestes tempos: A chegada da intelixencia artificial. 

Deixamos por aquí o resumo da reunión e un enlace ao xogo para entrenar o ollo ante as imaxes creadas con IA, por se na casa queredes seguir practicando! 



xoves, 16 de xaneiro de 2025

CLUB DE LECTURA: Matar a un ruiseñor

 


O pasado 28 de Novembro tivo lugar a primeira reunión do club de lectura de 5° e 6°. Deixamos por aquí as reflexións da xornada e agardamos con ansia a seguinte reunión, que celebraremos esta mesma tarde. 

luns, 17 de xuño de 2024

Agasallos para os participantes no Club de Lectura.

E cun cariño moi especial despedimos o Club de Lectura deste ano. Un agasallo para os seus participantes para agradecerlles todos os bos momentos vividos xuntos en torno a lectura e máis.



Apertas da vosa amiga,
Chis, chis, plof, plof!💫

Levan tamén o libro de Antón Cortizas - Os gritos das Illas Lobeiras - que non nos dou tempo a ler para que poidan gozar del no verán.
Felices lecturas!

luns, 27 de maio de 2024

Los escribidores de cartas, no Club de Lectura

Hoxe tivemos reunión do Club de Lectura para falar de "Los escribidores de cartas", escrito por Beatriz Osés e que foi gañador do Premio Barco de Vapor no ano 2019.


E, si, si... escoitaches ben. Dixen escribidores. Di a R.A.E. que un escribidor é un "mal escritor"... ou tamén un "escritor prolífico". Calquera destas dúas acepcións encaixan perfectamente cos nosos protagonistas, non credes?

É un libro que se devora a toda velocidade, xa que nos deixa coas ganas de profundizar na historia e nos seus persoanxes, xa que son moitas as historias que nos brindan cada un dos habitantes do pobo de Noaberri. 

Ademais, os nenos teñen unha estupenda relación cos maiores e os maiores con eles. O salto xeneracional diminúese porque teñen como punto en común as cartas, e os sentimentos que son quen de plasmar nelas.

Esta aventura está chea de tenrura e solidariedade e ainda que poñamos en dúbida se os enganos que levan a cabo os nosos protagonistas son correctos ou non. Este libro premítenos establecer un debate sobre se o fin xustifica os medios en torno aos problemas de cada unha das personaxes que aparecen na historia, que nos farán reflexionar, sen moralina.

E claro, esta reunión non podía rematar doutra forma que escribindo cartas. 

As cartas escritas de puño e letra xa é algo que rara vez se ve. Unha rara avis ao borde da extinción nesta era cada vez máis dixitalizada. Mais a autora, non demoniza os novos tempos, senon que pon de manifesto como a profesión de carteiro - como tantas outras - foi mudando co pasar do tempo.

No libro podemos ver fragmentos das cartas que escriben os nenos e tamén os whatsapps que intecambian entre eles. Unha combinación interesante que nos recorda que escribir e comunicarse sempre será o mesmo, ainda que xa non o fagamos con papel e boli.

A quen irán dirixidas estas cartas? Seredes unha das afortunadas en recibilas? Non tedes curiosidade?

Proximamente, na casa de...

martes, 21 de maio de 2024

Andrea Maceiras, alma de bolboreta

Hoxe tivemos a grandísima sorte de que Andrea Maceiras viñera a visitar a nosa biblioteca, grazas á Editorial Xerais. Veu para falar do seu libro Alma de elefante, libro recomendadísimo, que foi unha das primeiras lecturas do noso Club de Lectura e que tamén leuse colectivamente na aula de 5º e 6º de Primaria. 

Preme nesta imaxe se queres ver máis fotos.

Veu falar do seu libro, claro, pero tamén falounos da historia oculta nel, que nace nas primeiras follas... xusto incluso antes de que comece a historia. "Alma de bolboreta", é a historia que inspira o nacemento dun libro e que nos axuda a comprender como xurde a inspiración nas propias vivenzas.


Como podedes ver, non só a historia de Alma de elefante atrapou á rapazada, senon tamén todo o que saía pola boca de Andrea Maceiras. Conectou con nós dunha forma moi especial e levounos ata a selva  de Sat Naapa para atoparnos coa velliña Champey e descubrir a nosa alma. Tigre? Dragón? Paxaro? 

De que tes alma ti? Andrea, sen dúbidas, ten alma de bolboreta.

Asinou os seus libros e deixounos unhas fermosísimas liñas no libro de visitas. Un pracer, Andrea! Podes voltar cando queiras. Esta é a túa casa.

luns, 29 de abril de 2024

Club de lectura: Quen salva un can?

Hoxe tivo lugar o terceiro encontro do Clube de Lectura, desta vez para falar sobre o libro de Érica Esmoris, Quen salva un can?, publicado pola editoiral Xerais.

Que farías ti por salvar o teu can? Rai, o noso protagonista, faríao todo. Por amor á súa cadela Nona, Rai lánzase á aventura máis disparatada e, por momentos arriscada, na terra onde os cans falan.
Conducido polos cans Brutus Máximus, Matateu von der Lempertaler, Sete e Garlapata, e pola gata Laika (voluntarios da impopular asociación Amigos dos Humanos), Rai terá que atravesar as montañas Xemelgas, cruzar o bosque Escuro, superar o río Inquedo e, o máis importante, descifrar o corazón dos cinco voluntarios. 

Un libro para falar de aventuras, emoción e humor nunha historia de busca e repleta de sorprendentes achados.


O que nos fai conectar coa historia de Chuchel,  un xogo cómico de aventura dos creadores de Machinarium, Botanicula y Samorost.
Nesta historia de ficción dixital teremos que unirnos ao peludo Chuchel e ao seu rival Kekel na misión de alcanzar unha preciada cereixa a través de numerosos desafíos!
Cun sentido do humor desenfadado, música e efectos da banda DVA - galardonada en los Premios IGF - sacaranlle un sorriso ate o máis serio.

Isto non fixo máis que comezar!

mércores, 24 de abril de 2024

Encontro con.. Pere Tobaruela

Pere Tobaruela visitou a nosa Biblioteca hoxe pola mañá e tivo un ameno encontro literario cheo de risas co alumnado de 3° a 6° de Primaria para falar dos FORMIG4S e as súas misións, en especial a Misión Rosalía, que ademais é un dos libros que se leron no Club de Lectura.

 
Preme nesta foto para acceder ao álbum con máis fotos.

Grazas a Edicións Xerais por facer este encontro posible. Estamos desexando que saia a seguinte aventura dos FORMIG4S! Aaaalgooo xa sabemos, eh?

luns, 19 de febreiro de 2024

FORMIG4S: Misión Rosalía no Club de Lectura


Unha nova reunión do Club de Lectura na que falamos sobre estes catro integrantes dunha brigada un tanto especial - FORMOS4, FORX4N, FORNEL4 e FORM4IL - das súas personalidades e do papel que xogan cada un deles na narración.
Ademais, o carácter biográfico de «Misión Rosalía» achéganos de maneira incipiente á vida e a obra de Rosalía de Castro, poeta que deben atopar e "rescatar" os FORMIG4S.
Para investigar este estraño suceso han viaxar no tempo ata o século XIX por Compostela e a súa contorna. Alí vivirán unha trepidante aventura cun final máis que sorprendente.

Falamos tamén das ilustracións, de como se misturan as páxinas de narración coas de banda deseñada... e quedámonos con moitas ganas de coñecer a Pere Tobaruela porque gustaríanos saber máis desta e das outras aventuras de FORMIG4S.

luns, 8 de xaneiro de 2024

Primeira reunión do Club de Lectura: A Señorita Bubble, de Ledicia Costas

E este trimestre a actividade da Biblioteca comeza con moita forza, xa que hoxe celebrouse a primeira reunión do Club de Lectura para falar sobre o libro "A Señorita Bubble", escrito por Ledicia Costas,  ilustrado por Andrés Meixide e publicado por XERAIS.

Xuntámonos e falamos sobre o libro, sobre se gozamos ou non coa súa lectura, e por que... falamos da autora e doutros libros escritos por ela... falamos de todas as inferencias que podíamos facer co noso imaxinario e sorprendímonos de cántas cousas sabiamos... falamos das temáticas ocultas dentro da historia: da diversidade, do respecto á diferenza, do valor da autenticidade, dos tipos de familia, e máis.


E para rematar o encontro, comezamos a dar os nosos primeiros pasos na mediación sobre ficción dixital, falando dos vídeoxogos aos que xogan, analizando as súas temáticas e as técnicas de xogo que se empregan, para rematar a sesión xogando a BeeCarbonize, de Charles Games, un xogo de estratexia de cartas medioambiental no que o cambio climático é o oponente. 

A través do xogo, e a medida que se van desenvolvendo as partidas, establéceuse un diálogo entre o alumnado co que tentaban buscar solucións aos problemas que ían xurdindo, compensando as emisións de carbono da industria con reformas sociais, políticas ecolóxicas e esforzos científicos. Unha forma diferente de xogar, máis reflexiva ca que están acostumados e coa que tomar conciencia do cambio climático.




O próximo libro??? 
FORMIG4S: Misión Rosalía, escrito por Pere Tobaruela e tamén ilustrado por Andrés Meixende, de novo publicado por XERAIS.