Amosando publicacións coa etiqueta Teatro Jofre. Amosar todas as publicacións
Amosando publicacións coa etiqueta Teatro Jofre. Amosar todas as publicacións

venres, 2 de xuño de 2023

"Historia dunha reconversión" no Teatro Jofre

E foi! E para nós non puido ser máis emocionante! Sentímonos orgullosas e agradecidas de poder levar o nosa obra de teatro musicalizada "Historia dunha reconversión" ao Teatro Jofre de Ferrol dentro do ciclo de "Teatro con G" organizado pola Equipa de Normalización Lingüística de Ferrolterra.

Agradecidas tamén aos nenos e nenas polo seu esforzo e talento. E ás familias, nas que delegamos todo o tema de vestiario e que encheu as plateas do Jofre para gozar deste espectáculo feito con moitísima  ilusión. E xa se sabe que da ilusión só poden sair cousas bonitas.

Deixámosvos unhas fotos, diferentes ás que estades acostumados, pois xa sabedes que durante a representación non está permitido facer vídeos nin fotografías. Hai algunhas que sacamos durante o ensaio previo. Outras chegáronnos a través das familias que asistiron como público. Pero o importante son os recordos, que eses quedan gravados no corazón para sempre. 








Preme nesta última imaxe para acceder ao álbum.


mércores, 19 de maio de 2021

Teatro con G: "As pitas baixo a choiva"

E para celebrar o mes das Letras Galegas, o Concello de Ferrol lanzou un ano máis a súa programación teatral para os centros escolares, "Teatro con G", pero con limitacións de aforo, como todo. Por iso este ano non acudimos ao Teatro Jofre para ver algunha das obras ofertadas, como é costume e tivémonos que conformar con vela desde o cole, iso si, na pantalla grande, case, case coma no cine.

A obra escollida foi "As pitas baixo a choiva", unha versión teatral e musicada de Teatro Ghazafellos, da obra co mesmo nome de Ricardo Carvalho Calero, a quen se lle adicou as Letras Galegas o ano pasado.

Como fai un ano estábamos aínda confinados, quedamos co arelo da estrea desta divertida obra de teatro na que Ludivina e Tereixa, dúas galiñas que viven no galiñeiro de Barreira pasan moitos traballos chocando un ovo á espera de que o neno Ricardiño vaia visitalas. Así que non podíamos deixar escapar a ocasión de vela! 

Aquí vos deixamos un bocadiño.

martes, 9 de maio de 2017

AS FABAS MÁXICAS, DE CARAMUXO TEATRO

Esta mañá, no Teatro Jofre, Caramuxo Teatro presentou o espectáculo de monicreques "As Fabas Máxicas"
Sinopse: 
Unha adaptación do conto clásico "Xan e as fabas máxicas" nunha clave máis contemporánea, misturando o teatro de actor e monicreques.

Xan e a súa avoa vivían nunha pequena casa co único que tiñan, unha vella vaca chamada Flora que xa non daba leite. Un día Xan cambiará a súa amiga Flora por unha fabas moi especiais e aí comezará unha fantástica aventura...

Caramuxo Teatro presenta unha nova versión do clásico popular .Un espectáculo contado en primeira persoa a través do teatro de actor e de monicreques.Xan vive agora nun pequeno apartamento dun dos edificios mais altos de Nova York.Coidando as plantas da súa terraza, descobre algo sorprendente, que lle lembra unha asombrosa infancia chea de aventuras.
Unha proposta de lecer en familia para nenos a partir de 4 anos cunha coidada estética na que o humor, a emoción, e a poesía mistúranse para dar unha visión contemporánea do coñecido conto infantil.

xoves, 25 de febreiro de 2016

O RAPOSO E A MESTRA, de MANUEL O´RIVAS

Onte, á parte de celebrar o Día de Rosalía, os nenos e nenas de 3º asistiron ao Teatro Jofre a ver o espectáculo de "O raposo e a mestra", de Manuel O´Rivas, con ilustracións de Jacobo Fernández Serrano, publicado pola  Ed. Xerais, na colección Sopa de Libros.
Podedes facervos unha idea do que alí aconteceu, xa que atopamos esta  gravación doutra ocasión, que tiramos de Internet, subido por A. Fernández.

E aquí están as nosas fotos. Agradecemos a Manuel este espectáculo e a súa paciencia á hora de atender a todos os pequenos e pequenas. Moitas grazas polas túas palabras agarimosas e o teu bo facer. E a Xerais e ao Concello, grazas por eses libros, e por poder celebrar este día especial cunha fermosa actividade e nun ambiente tan agradable, coma sempre que visitamos o teatro da nosa cidade.

Agardando...




Baño de multitudes

A despedida
.

domingo, 2 de decembro de 2012

"O MEU PRIMEIRO CELSO EMILIO" NO JOFRE

O grupo de 5º e 6º con Xiana Lastra
Autores: Xiana e Xosé Lastra
O pasado día 16 de novembro asistimos no Jofre, e invitados polo Concello de Ferrol, ao concerto "O meu primeiro Celso Emilio". Unha magnífica presentación do libro-disco ilustrado por María Manuela e editado por Xerais, onde se combinou a música e os seus poemas con pequenas curtas audiovisuais que percorreron os momentos máis importantes da vida do poeta.
O proxecto reúne a un importante elenco de artistas; algunhas das voces cunha sólida traxectoria, coma María Manuela, Mini e Mero, a quen ver aparecer no escenario produce unha lene hipnose ; e Xiana, que nos cativou con ese "Agardarei". Mmmm... Felicitacións a todos eles; e aos músicos, moitos, amigos: Xurxo Varela, Pablo, Manolo, Paco Barreiro (Dangarandán. 16 pezas tradicionais galegas arranxadas para guitarra)... Foi todo un agasallo para os nosos oídos e para a nosa alma.
O libro sairá nas recomendacións de Nadal da nosa Biblioteca porque lelo e escoitalo é todo un pracer. 
No centenario do nacemento de Celso Emilio: 
"O meu primeiro Celso Emilio"
¿Queredes ver o booktrailer?

"O meu primeiro Celso Emilio" from Seispés Producións Creativas on Vimeo.
O vindeiro 12 de decembro a media mañá, é dicir o 12 do 12 do 12 ás 12 h. o alumnado do 3º ciclo participará na actividade promovida pola Coordinadora Galega de Equipos de Normalización e Dinamización Lingüística: RecitandoCelsoemiliO. E este "O meu primeiro Celso Emilio" serviunos para facer unha selección dos poemas a recitar:
POEMA EN SILENZO: 
-Dorna feituca do berce
a navigar polo ceo...
-Chsss
                         Silenzo,
que vai espertar o neno.

CANCIÓN:
O vello cantaba
unha lembranza.
O mozo cantaba 
unha esperanza.
O neno cantaba
unha louvanza.
Pobo meu: pois que cantas,
érguete i anda.

VIAXE AO PAÍS DOS ANANOS
Teño o corazón senlleiro
e orfo na noite fría.
Non importa, agardarei
polo albor do novo día.
Teño lobos, teño sombras, 
teño a sorte fuxidía.
Non importa, agardarei
polo albor do novo día.
Está mudo o reixiñol
que outrora cantar solía.
Non importa, agardarei
polo albor do novo día.
Que está comigo a esperanza,
fiando, fía que fía...
Ela fía e eu confío
no albor do novo día.

Recitaremos estes tres poemas xunto con "Deitado frente ao mar"

mércores, 9 de febreiro de 2011

"O HUMOR NA ÓPERA"



Onte fomos ao Teatro Jofre a ver, tal e como tiñamos anunciado, un espectáculo sobre o humor na ópera. Unha selección de catro pezas que se correspondían con outras tantas óperas. Non interpretaron a tan esperada "La flauta mágica", de Mozart, pero si puidemos ver outras tres: "Así hacen todas" de Morzart, "El barbero de Sevilla" de Rossini e "El elixir de amor" de Donizetti.
Na Biblioteca e nas aulas traballamos co libro "ÓPERA". Se non o coñecedes, recomendámovolo. É un fermoso libro na que están recollidas as máis importantes óperas de todos os tempos e os seus autores. Está belamente ilustrado por
Ericka Martínes; e os textos son de Juan Arturo Brennan. Editorial Castillo, na súa colección El Armadillo

Tamén podedes disfrutar dun pequeno vídeo da recente representación en Ourense de "El Humor en la Opera" - Camerata Lírica de España. Fonte: tempodelecer

xoves, 12 de marzo de 2009

BOLBORETA- Títeres Trompicallo




"Bolboreta é a historia dun monstro peludo, un rei egoísta e unha nena valente capaz de vencer todos os obstáculos para salvar os seus seres máis queridos."
Onte, a Infantil e 1º ciclo de Primaria tocoulles visitar o Tatro Jofre, coma aos maiores o día anterior. Os Títeres Trompicallo foron os encados de que estes bonecos cobrasen vida e de que os pequenos pasasen un bo ratiño na súa compaña.
Ambas visitas realizáronse grazas ao programa de actividades que Caixanova oferta aos escolares de Ferrol.
Aquí vos deixamos unha fotos que puidemos facer antes de que empezase a función, e tamén a da saída, como vén sendo tradicional.
Ata a próxima!!

martes, 10 de marzo de 2009

AS FORMAS NA MÚSICA, no Teatro Jofre

As Formas na Música é o título dunha das actividades que Caixanova oferta aos escolares de Ferrol. E alí fomos, desde 3º a 6º.
"¿Que forma ten unha laranxa?, ¿e un televisor?, ¿que forma ten a mesa? Partindo destas preguntas podemos analizar ... ¿E que pasa coa música?...
A música non ocupa espazo; a música ocupa tempo... Para comprendela precisamos o tempo e a memoria"
Escoitamos, aprendendo a importancia do silencio na música; tocamos palmas, cantamos, analizamos estruturas de Tchaikovsky, do Carmina Burana de Carl Orff, de Leroy Anderson... e aprendimos unha canción "improvisada", recordádela?:


"Teño unha moto especial
pois unha roda cadrada ten.
Corre dando saltos, que ben vai;
a miña moto parece un tren."
Aprendemos case sen darnos conta e foi moi divertido; pasámolo fenomenal.
Os que queran repetir mañá, que levanten a man...
Socorrooooooo!


mércores, 17 de decembro de 2008

"Los músicos de Bremen" no Teatro Jofre


Os alumnos e alumnas do 2º e 3º ciclos de Primaria tiveron a oportunidade de asistir unha vez máis ao Teatro Jofre para ver a representación teatral "Los músicos de Bremen", baixo a dirección de Caludio Casadio. Está interpretada por Eriz Alberdi, Tomás Fernández Alonso, Ramón Monje e Andrés Bezarez.
Con esta obra de teatro despedimos as saídas do 1º trimestre, pero non as actividades, xa que no festival do día 19 poderemos ver máis teatro, pero esta vez a cargo dos nosos actores e actrices.