Amosando publicacións coa etiqueta Queima do Meco. Amosar todas as publicacións
Amosando publicacións coa etiqueta Queima do Meco. Amosar todas as publicacións

venres, 9 de febreiro de 2024

E así foi a nosa celebración do Entroido en Banda Deseñada

Hoxe o cole estivo invadido das máis variopintas personaxes da banda deseñada... clásicos, modernos, do país, do manga... dos que saen nas pelis, dos que case ninguén coñece... E dímonos conta que isto é un universo no que temos moito por descubrir. 

E ti, de que vas? Foi a pregunta máis repetida ao longo da mañá. Desde a Mafalda de Quino, ou Tintín e o Capitán Haddock de Hergé... ata Doraemon de Fujimoyo ou Arale de Toriyama do mundo manga, superheroes e superheroínas Marvel e por suposto outros máis próximos, como os Zipi y Zape de Escobar ou Dora a desbrozadora do noso Luis Dávila... todos estes e moitos máis estiveron presentes no noso entroido en banda deseñada.

Preme nesta imaxe para ver as fotos deste día.

E como a choiva deunos un respiro saímos a dar unha volta ao redor da escola para lucirnos acompañados das nosas familias. 

Xa de volta puidemos degustar unha merenda con doces entroideiros feitos na casa, grazas á colaboración da ANPA, quen se encargou da loxística dos petiscos e o reparto. Coma sempre, grazas!



E como a choiva seguiu respectándonos, queimamos o Meco, que viña disfrazado do Otilio "chapuzas a domicilio", a ver se nos remata as obras no cole dunha vez por todas... Iso si, non sen antes proceder á lectura do seu testamento.


E logo festa rachada... Música e bailes para a rapazada!


Que viva o Entroido e que viva a banda deseñada!

venres, 17 de febreiro de 2023

E así festexamos o Entroido!

E despois de gozar tanto co xogo dos 100 días, tocaba pasalo ben co entroido. Houbo moita música e bailes, desfile e xogos. 


Preme en calquera destas fotos para acceder ao álbum completo.




Pero tamén houbo... merenda entroideira! Grazas, unha vez máis, á nosa ANPA molona que mobilizou a un montón de familias para que puidéramos degustar os doces típicos destas datas. Houbo roscas, freixós e orellas a fartar, das que demos boa conta. Unhas larpeiradas caseiras unha vez ao ano, tampouco fan dano, verdade?



 Estaba boísimo todo!!!

E despois démoslle o seu merecido ao noso "Meco Gasolino", neste entroido no que reclamamos accións cara a unha transición enerxética sostible, non sen antes darlle lectura ao seu testamento!



e que ademáis podedes escoitar aquí, nas voces de Q.S.U., e tamén no noso blog da radio "Son de Pazos".






Que viva o Entroido!!!

venres, 25 de febreiro de 2022

Entroidando cos #ODS. Todo un reto!

Xa sabedes que este curso andamos a voltas cos ODS da Axenda 2030 e por iso este ano o Meco trouxo estes mandados tan singulares e que tanto nos fixeron romper a cabeza. Pero o importante non eran os mandados, senon pasalo ben argallando estes divertidos complementos e entroidar, porque vainos moito a festa. 

O Entroido é unha celebración moi tola no que todo está permitido. E como neste mes de febreiro estamos a traballar o ODS 12: PRODUCIÓN E CONSUMO RESPONSABLE, os nosos disfraces podían ser de calquera cousa, pero seguindo a premisa de que fose sustentable. Xa sabedes o das 3R´s, verdade? REDUCE, REUTILIZA E RECICLA.
Pois iso, o disfraz de choqueiro de toda a vida! 
Que se un sombreiro por acá... que se voume facer este complemento cunha caixa de cartón... que isto que ía ir ao lixo vouno poñer aquí... e voilá! Argallamos un disfraz de baixo custo, mínimo impacto ambiental e ademais pasámolo ben construíndoo. Que máis se pode pedir? 

Pois xa postos, imos pedir música, un pequeno desfile, algo de festa... 





Houbo premios para os mellores disfraces e foron concedidos por aclamación popular, non como no "Benidorm Fest", xa que foi o propio alumnado quen decidiu cales tiñan que ser os gañadores.
E foron:
Irene (3 anos), Érica (2ºEP), Emma (3º EP) e Samu (6ºEP)
Menudos artistas!!!
 E de premio... unha escarapela reciclada e improvisada a máis non poder!!!

E por pedir... imos pedir tamén algo saboroso de comer, que o entroido é tempo de lambonadas. E se pode ser, un chocolate quentiño para acompañalas.

Grazas á nosa ANPA molona que como sempre non dubida en botar unha man na organización das merendolas!!!
Olaia, Pipi, Rebe, Andrea e Noelia. Grazas! 
Pero grazas tamén a todas as que colaborastes na sombra e non saídes na foto.

E tocou queimar o Meco, pero o vento concedeulle o indulto. Aínda así, procedimos á lectura do seu testamento e agardamos que o indulto sexa temporal e que a volta poidámolo queimar.



Viva o entroido e vivan os #ODS!!!

venres, 12 de febreiro de 2021

Celebramos o Entroido: superheroes e superheroínas contra o coronavirus 👾💥

E hoxe venres tocou celebrar o Entroido. E aínda que non foi coma outros anos, nos que saíamos en pasarrúas polo arredor do colexio e tomábamos unha rica merendiña típica destas datas acompañados das nosas familias, este ano tamén pasámolo moi ben. 

Xa tíñamos ganas de "xuntarnos" e compartir alegrías. En todo momento respectáronse os grupos-burbulla, pero puidemos facer algo todos e todas xuntos á vez. E non podía ser mellor cousa que celebrar o Entroido como se merece.

Ao longo da semana fomos creando os nosos disfraces de superheroínas e superheroes contra este malvado vilán personificado no Meco, e que non podía ser outro que o coronavirus. Que se un día o cinto; que se ao seguinte algo na cabeza; outro día o logo cos superpoderes; e, por suposto, non podía faltar o complemento estrela: A CAPA!

E así chegamos ao venres dispostos a entroidar. Na primeira parte da mañá, cada grupo tivo sesións de xogos axeitadas á súa idade en diferentes localizacións: biblioteca, salón de actos, aulas... Foi moi divertido ver tanto superheroe e superheroína en acción pola escola. 


E para mostra, un botón. Aquí tedes aos máis peques na Biblioteca: contos, lego, ordenadores, pezas de construcción e robots para estes pequenos con superpoderes!

Tra-la parva habitual, na que gozamos de froita e leite dentro do programa de merendas saudables na escola - este ano non houbo nin freixós, nin orellas, nin torradas 😢😢😢 - saímos a brincar ao patio, delimitado por zonas. Tivemos sesión "discoteca" e bailamos ata caer de cu ao ritmo da música coas nosas profes. Pasámolo xenial! 

E despois, como o tempo nos deu unha tregua, aproveitamos para queimar ao Me-coronavirus, que rendeuse ante tantos superpoderes facendo unha reverencia, non sen antes dar lectura ao seu testamento.


E as fotos??? Pois como sempre, premendo na imaxe a continuación.


Que viva o Entroido!!!

venres, 21 de febreiro de 2020

Entroido 2020: Disfrazámonos de Ferrol

Este ano tiñamos moi claro que os nosos disfraces tiñan que ser sobre Ferrol, así que aproveitamos para disfrazarnos de lugares da nosa cidade.

(preme nesta imaxe para acceder a todas as fotos)

Os peques de Pazos vestíronse do MERCADO DA MADALENA, co emblemático edificio da peixería de Rodolfo Ucha ao frente, eles foron vestidos de froitas e peixes.

Os rebuldeir@s de Pazos foron do PARQUE RAÍÑA SOFÍA e dos seus máis coñecidos habitantes, sen dúbida, os pavos reais.


Os medianos do cole decantáronse polo PEIRAO DE CURUXEIRAS, e foron disfrazados de mariñeiros e pescadores, que son os traballadores do porto.

E os maiores decidiron ir do CONCELLO e os seus ILUSTRES FERROLAN@S: Concepción Arenal, Ricardo Carvalho Calero, Xoán Farias, Pablo Iglesias Posse, Camili Díaz Baliño, Fernaándo Álvarez Sotomayor, Jenaro Pérez Villamil, José Fontenla Leal, Ángeles Vilariño, Ramón Plá y Monge, Juan García Niebla, Victor López Seoane... entre otros.

Realizamos un pequeno pasarrúas ao redor do noso cole acompañados polas nosas familias para finalizar cunha gran foto de grupo. 



Despois demos conta dunha riquísima merenda que preparou a ANPA do centro: doces de entroido acompañados con chocolate quentiño... 
Pero mira que somos larpeir@s!



Xa no patio, procedimos á queima do Meco, que como non, este ano tamén ía vestido de ferrolano, máis concretamente de integrante dunha das Rondallas Ferrolanas das Pepitas.



Un ano máis o alumnado de 5º e 6º de Educación Primaria deu lectura ao testamento de tan querida personaxe antes de o botar á fogueira. Convertido xa en cinzas, comeza para nós o verdadeiro entroido: cinco días sen escola na que poder disfrutar en familia do pracer de converterse, ainda que sexa por uns intres, naquelo que resulta imposible. 


Que viva o entroido, que viva Ferrol e que viva o cole de Pazos!!!