A profe Claudia, referente no fútbol sala feminino

Todas e todos coñecémola ben porque temos a sorte de compartir con ela este curso, pero o que ao mellor moitos de vós descoñecedes é que a profe Claudia foi futbolista profesional co CS Burela Pescados Rubén durante unha década. Capitana do equipo durante moitos anos e con 210 partidos xogados na élite do deporte, ten un palmarés impresionante:

Campioa de Primera División na tempada 2015/2016;

Campioa da Supercopa de España no 2015;

Campioa coa Selección Galega no 1998, 2004, 2006 e 2008

e Campioa na Copa Xunta de Galicia no 2005, 2007, 2009 e 2010.

A súa paixón pola bóla levou a Claudia Rodríguez Teijeiro (Foz, 1984) a facer grandes sacrificios durante unha década na que xogou co Burela Pescados Rubén, a excepción dun ano que o fixo no Valladolid.

Tras estudar TAFAD e Maxisterio por Educación física, compatibilizou o seu traballo de mestra co deporte de primeiro nivel: «A primeira vez que traballei como mestra, chamáronme de Fisterra, e tiña que aceptar para non quedar fóra das listas. Algunha tarde tiña clase e adestraba en Burela, facía catro ou cinco viaxes á semana. Despois tocoume en Ourense, e aí polo menos adestraba co Envialia».

Xusto despois de gañar a Supercopa e a Liga co Burela, unha rotura nos ligamentos do nocello esvaeceu as súas arelas. Tras loitar para voltar meses despois, retirouse no 2017: «Estaba fatigada mentalmente, tamén polo traballo. Foise sumando un pouco todo: compromisos laborais, a grande esixencia física e psicolóxica do CD Burela FS, a miña lesión na Copa de España...»

É unha mágoa que deportistas de primeiro nivel, por seren mulleres, teñan que compatibilizar a súa carreira deportiva con outra carreira profesional para sosterse economicamente, o que fai que non podan dar o mellor de si mesmas na faceta das súas vidas nas que destacan.

«Boto de menos cousas. Se vexo un partido, a miña parella di que son pesada porque comento as opcións que vexo. Pero non volvín tocar un balón. Aínda me chama algún equipo, pero non quero. Tería que perder os venres no cole para viaxar. Non podo».

Querédela ver en acción? Aínda que este partido non o gañou o equipo de Claudia - o CS Burela FS - e no minuto 42 lesiónase, aquí vos deixamos este vídeo co que poderedes gozar co seu xogo. Non perdades detalle, porque paga a pena vela. Toda unha campioa!