Chegou a maleta de Chispa no Día do Libro!!!

Pois ao pouco de chegar ao cole, soou o inconfundible Chis, chis, plof, plof... que pon o cole patas arriba e que chea de algarabía corredores e escaleiras arriba ata chegar á Biblioteca.

Non podía ser de outra forma: hoxe, 23 de abril, Día do Libro, pasou polo cole a nosa meiga Chispa e deixounos na biblioteca unha chea de novidades lectoras, algún que outro artefacto e... Bon, mellor que o conte ela mesma, a través da súa carta:

Pois o dito. Aquí tedes as instrucións de Booktuber's do cole de Pazos e as do Concurso de Portadas. Non deixedes de participar!!!

Xunto ás maletas cargadas de novidades lectoras interesantísimas para completar o catálogo da nosa biblioteca, Chispa deixounos tamén un agasallo excepcional! Un exemplar para cada familia do libro "García Niebla: entre a innovación educativa e o compromiso cidadán", escrito por Guillermo Llorca Freire, co quen tivemos a honra de compartir unha sesión divulgativa da figura deste mestre exemplar na nosa Biblioteca o mes pasado co gallo do cambio - ou máis ben ampliación - de nome do noso Centro. Menudo agasallo!!!

E xa sabedes, como ben dicía Chispa...

Se non les non pasa nada, 

pero se les... pasan moitas cousas!

Felices lecturas e feliz Día do Libro a todos e todas!!!

Formación STEAM no cole con Gazapo

Que non coñeces aos de gazapo??? Non pode ser!!! Se arrasan ano tras ano nas Lego League! 

Pois tivemos a sorte, e grazas a formar parte do proxecto da Asesoría de Bibliotecas Escolares de Biblioteca Creativa, de recibir unha formación STEAM con eles para o alumnado de 3º a 6º de Primaria.

Preme nesta fotografía para acceder ao álbum deste día.

Comezaron os maiores de Q.S.U. cun obradoiro Makeblock, no que montaron os Mblocks en grupos cooperativos e empregraron a aplicación Makeblock para controlar os robots que acababan de montar superando  un circuíto desafío utilizando o modo “conducir”. 

Para rematar realizaron varios retos de programación en SCRATCH utilizando a app MBlocky. Unha pasada!!!

Despois do recreo foi a quenda dos Tritóns. Elas e eles realizaron un obradoiro co Lego BricQ de carreiras de vehículos. 

Entre todas e todos construíron unha pista de carreiras con pezas de “Hotwheels” na que terían que superar varios desafíos:

Primeiro desafío: Coche de inercia. Utilizando os kits de Lego construiremos de forma libre un vehículo para lanzar pola pista.

Segundo desafío: Vehículo con velas. Construiremos un vehículo que terá que moverse utilizando unha pequeña vela de Lego. Para facelo funcionar utilizaremos unha pequeña turbina portátil.

Grazas a Gazapo por compartir con nós a xornada. Podedes voltar cando queirades. Aquí vos somos moi argalleir@s!!!

Que sorte de biblioteca a nosa!

Novo trimeste e nova misión!

Chegou a primavera e nestes meses tan chuviosos non puiden deixar de pensar nesta nova misión, xa que con este ODS tocará “mollarse”. É a quenda de traballar sobre o ODS 6: AUGA LIMPA E SANEAMENTO.

Déixovos no blog, coma sempre, uns vídeos para romper o xeo e que poidan fluír as ideas sobre este ODS, ainda que de seguro sabedes máis do que pensades.

Seguide a recoller toda a información nos cartafoles das misións ODS e facédemos chegar a través da caixa de correo da Biblioteca. Ao final do trimestre organizaremos unha feira ecosostible na que teredes que explicar os vosos proxectos á nosa comunidade, así que é moi importante que vaiades recollendo os indicios do voso traballo.

RECORDA: Ti formas parte do cambio. Pásate á acción!

Pequenos xestos poden contribuír a lograr un mundo mellor.

#esPazODS_para_a_concienciACCIÓN

E xa sabemos quen gañou o I Concurso de inventos!

Premio! Premio! Xa temos gañadores do I Concurso de Inventos que organizaron as peques do equipo das ESTRELAS FUGACES!!!

Aroa, de 5ºE.I. co seu coche autopropulsado, e

Emma e Enzo de 4ºE.P. co seu barco-quenlla a motor.

Parabéns aos premiados!

Que conste que unha das normas da votación era "Non podes votar polo teu invento". Aínda así houbo un dobre empate entre o coche autopropulsado de Aroa e o barco-quenlla a motor de Emma e Enzo. Polo que o premio foi dobre: un trofeo super-molón con engranaxes feito na nosa impresora 3D.

E para que vexades que non houbo nin trampa nin cartón, velaiquí tedes os resultados de tan difícil votación. 

Aquí nos podedes ver testeando os trebellos presentados neste I Concurso de Inventos e damos fe de que todos funcionaban correctamente! Sodes unhas enxeñeiras e enxeñeiros de primeira!

O equipo das estrelas fugaces preparou tamén os diplomas de participación para todas as compañeiras e compañeiros que presentaron os seus inventos ao concurso. Como vedes, tomámolo moi en serio!

Encantounos esta actividade porque incentivounos moito na procura de solucións aos problemas de deseño que tiñan as nosas máquinas e fomos quen de lograr melloralas. Bravo por todas e todos nós!

Ioga na escola (II), coas nosas familias

Este mes, a piques de sair de vacacións do 2º trimestre, abrimos as nosas portas ás familias que puideron achegarse ata a escola para compartir con nós a sesión de ioga con Lali, unha actividade enmarcada dentro da liña dos Contrato-Programa edu-saúde.

Sabemos que por cuestións de traballo moitas das que queríades compartir cos vosos fillos e fillas esta sesión é imposible, mais temos que axustar estas actividades dentro do horario escolar.

Sen máis deixámosvos con algunhas fotos das sesión de hoxe e se queredes ver toooodas as fotos, preme na primeira das imaxes.

Cos peques de Pazos:

Cos rebuldeir@s:

Cos tritóns:

E cos de Q.S.U:

Xa estamos desexando que volvas, Lali!

Namasté

Ler con... D: Emma e Leo contan "El lazo invisible"

Aínda coa resaca do día anterior e nunha biblioteca un pouco menos ordenada que de costume, Emma e Leo quixeron contarnos, antes de irnos de vacacións de Semana Santa, unha fermosa historia que fala dos lazos que nos unen a quen queremos, un libro que eles mesmos escolleron entre os das súas bibliotecas persoais. E que as mellores historias sempre son as que nos moven algo por dentro, verdade?

Preme nesta imaxe para acceder ao álbum.

Desta vez, o conto escollido foi "El lazo invisible", escrito por Patrice Karst e ilustrado por Joanne Lew- Vriethoff, da editorial Astronave, un delicado álbum ilustrado que conecta co máis íntimo de cada un de nós.

Xa vedes, que non perdíamos detalle da historia...

E se queres recordar esta fermosa historia sobre o poder do amor e a conexión entre as persoas que queremos, sen importar o tempo nin a distancia, aquí tedes de novo o conto en formato vídeo.

Moitas grazas pola contada, rapaces!!!