Portas pola igualdade da man de Blanca Vila

A verdade é que non tivemos oportunidade de ensinarvos o preciosa que quedou a porta pola igualdade que a véspera da suspensión das clases por mor do covid-19, o pasado 16 de marzo, Blanca Vila andou a darlle os últimos retoques.
Trátase dunha intervención sobre a porta da Biblioteca que separa a parte de consulta da Biblioteca do resto dela. Temos esa porta case sempre aberta, pero ás veces, vainos moi ben pechala xa que permite ter actividades moi diversas na biblioteca de forma simultánea. 

Pero agora, co bonita que quedou, imos querer tela sempre pechada, para lucila! 

A que quedou espectacular? 

Se queres ver como axudaron a pintar os rebuldeir@s e os pequesPazos a Blanca Vila, preme en calquera das fotos anteriores. E se queres saber un pouco máis sobre esta ilustradora ferrolá, podes ler esta entrevista que lle fixeron en "La Voz de Galicia" o pasado verán nesta ligazón.

Foto de: REBECA LÓPEZ , extraída de "La Voz de Galicia" - versión dixital.

Pero ademáis, Blanca Vila quixo facernos un "agasallo" moi especial, xa que tamén deixou a súa pegada noutra porta do corredor das aulas. Que é o que haberá detrás desa porta??? Pois de momento, só hai un espazo en construcción. Podedes xogar a adiviñar a que imos adicar este novo recanto do cole, deixando as vosas respostas nos comentarios desta entrada. Deixade voar a vosa imaxinación, pois a ilustración é do máis suxerente... Non credes?

Pintando portas con Blanca Vila

Blanca Vila de novo polo cole? Que estará a facer? Evidentemente, o que mellor sabe: PINTAR

Dentro dunha das nosas iniciativas dos Contrato Programa Inclúe, IGUÁLA-T, que ten como finalidade visibilizar o papel das mulleres ao longo da historia para alentar a participación feminina en todos os ámbitos de coñecemento, libres de estereotipos, pedímoslle a Blanca Vila que fixera uns deseños para decorar as portas das nosas aulas. Comezamos polas tres aulas que teñen un carácter máis especial:

O Mercado de Chispa, para o que lle pedimos un debuxo que representara a cooperación entre sexos.

A aula de proxectos, para quen escollimos a Ángela Ruíz Robles, percursora do libro electrónico e que fora ademais mestra na escola de nenas de Serantes.

E a aula de música, que quixemos adicarlle a Guadi Galego, unha das máis salientables artistas galegas contemporáneas e que ademais sentimos moi próxima xa que fora mestra no noso cole o ano que grabamos "Vente a Pazos", lembrades?

E para facer lo que mellor axuda que un exército de mans pequenas dispostas a experimentar. Ui, ui, ui... tarefa un tanto perigosa pero a mar de entretida. E se non, velaiquí as fotos.

Preme na imaxe para acceder ao álbum completo, se queres ver aos peques en acción.

E o resultado non puido ser máis marabilloso que iste!!!

Por fóra...

...e por dentro.

Cómo agradecerlle a Blanca Vila estas ilustracións tan fermosas feitas con tanto cariño? Pois os peques tiveron a idea de facerlle un agasallo: unha saca do Lectura e familias, que por certo tamén ilustrou ela, un lapis da Biblio Xoán Farias que case, case debuxa só e unha libreta para que non deixe de debuxar xamáis.

Estes peques son a bomba! 

Agora só nos falta que pase polo cole Guadi Galego a tirarse unha foto coa a porta da aula que a partir de agora levará o seu nome. 

Aí queda o convite!

Un patio para emocion-arte. Pintando con Blanca Vila.

Este ano máis que nunca, no que o distanciamento social é norma, precisábamos crear algo na nosa escola que nos emocionara. Así que mans á obra. 

Tras un proceso de reflexión decidimos encher o noso patio con cores que falen das emocións, do que nos gusta e o que nos disgusta, o que nos fai felices e o que nos da medo... Visibilizando os nosos sentimentos somos capaces de xestionalos. Así, entre todos e todas, facemos que o noso patio sexa un espazo único para a convivencia e a inclusión.

Pensando e pensando, animámosnos a realizar unha intervención artística sobre o muro gris que tiñamos na zona das gradas, para o que pedímoslle colaboración a Blanca Vila. Coñecédela, verdade? Blanca é unha ilustradora ferrolá vinculada ao Movemento das Meninas de Canido e que xa deixou a súa pegada noutros lugares do cole. Podedes ver esas "pegadas" premendo aquí.

Cada grupo, tras falar sobre as emocións en sesións de titoría, do que nos fai sentir ben e o que nos desagrada, realizou un deseño que simbolizase as súas inquedanzas sobre o tema. Xuntámonos así con 64 deseños, un por cada neno ou nena da escola, para formar un mural colectivo para emocion-arte. Creamos entre todos e todas algo que nos fai sentir o patio como propio, un lugar de encontro e un espazo para a convivencia.

Blanca Vila foi a encargada de trasladar os nosos deseños á parede e acompañounos en todo o proceso creativo. Moitas grazas pola axuda.

Ai... si, si! Que faltan as fotos do proceso. É verdade!

Pero isto é só unha mostra. Preme en calquera das fotos se queres velas todas, todas, todas.

Aínda non está rematado, non vos vaiades pensar. Fáltanlle os pequenos detalles e... ata aquí podedes saber. 

Non vos perdades o resultado final, eh?

Pero quen anda por aquí de novo?

 Blanca Vila en acción!

(preme na foto e poderás ver máis)

Que está facendo agora? Onde van estar colocadas estas figuras tan bonitiñas que está pintando para nós Blanca Vila? A verdade é que non soltou prenda, pero polo que parece a sorpresa vai ser tamaño súper-mega-xigante.

Chegamos ao final de curso! Máis un ano toca despedirmos.

Hai 10 meses comezabamos este curso 2020/2021 con moitos medos e inquedanzas, cos arelos postos na vacinación e confiando nuns protocolos que nos manterían nun entorno seguro dentro do cole: desinfección de espazos, lavado de mans, distanciamento social, materiais de uso individual, reducción da cabida dos espazos comúns e un sinfín de normas que fixeron posible que chegáramos ata o final.

Pasou de todo neste curso, confinamentos incluídos... pero de todo o vivido podemos sacar unha ensinanza: que xuntos somos máis fortes e que apoiándonos uns nos outros, case, case, somos invencibles!

Así que hoxe tiñamos moito que celebrar. E fixémolo cun montón de xogos. Como sempre, sen romper os grupos de convivencia estable, pasamos por catro estacións:

No ximnasio os peques tiveron xogos de movemento e os de Primaria tiveron a sorte de contar cun profe moi especial: Adrián, do clube de Tenis de Mesa Narón que lles ensinou moitas destrezas básicas para darlle ás pas e perfeccionar a técnica.

Despois, na pista polideportiva, tivemos unha sesión de xogos predeportivos coa profe Araceli. Os peques xogaron aos robots e ao pato-pato-oca, e os maiores decantáronse polo brilé e outros xogos.

Na Biblioteca estaba Tamara cun obradoiro de chapas, no que deixamos voar a creatividade elaborando deseños do máis orixinal.

E no Salón de Actos, coa profe Erea, tivemos sesión de "Just-Dance" para os peques e rebuldeir@s e "karaoke" para  tritóns e maiores.

Que ben o pasamos!!!

Entre medias, a nosa ANPA molona preparounos unha merenda supersaudable para repoñer enerxías a media mañá: bocatas de xamón, lombo e queixo e froita, moita froita: sandía, uvas, cereixas.... Hummmm, que saboroso!

Grazas a todos os membros da ANPA por facelo posible e a Rebeca, Laura, Noelia, Alba (e Olivia), Andrea e Sara (e Maia) por todo o currazo. 

Pero pasaron mooooitas máis cousas! Fixemos entrega dos premios da VII Edición de MatesPazos. Unhas mochilas como premio á participación (que xa son un clásico!) e un premio especial para @s gañador@s: un xogo co que por en funcionamento as habilidades matemáticas ou de razoamento que xa demostraron. 

Bravo por elas e por el!!!; Case, case todas nenas, eh? Veñen pisando forte!

E tamén houbo entrega dos premios dos retos TIK TOK coa profe Kelly das aulas de música deste último trimestre: Un minitrofeo con forma de corchea, como o propio logo tiktokeiro, saído da nosa impresora 3D e un chifre de caramelo para os mellores de cada grupo!!!

E máis cousas... 

Reparto das fotos do recordo escolar que este ano correu a cargo de Mirada de Madrina, as nosas fotógrafas preferidas, para que negalo 😍

Estrea das pizarras do patio que pintou para nós Blanca Vila...

Últimas fotos de grupo...

E un sopro de maxia da man de Chispa: Chis, chis, plof, plof!

E despedidas, sinaturas de recordo dos compañeiros, sorrisos enmascarados, bágoas, confidencias de último momento, e sobre todo bos desexos para os que comezan unha nova etapa.

Desexámoslles moi boa sorte no seu camiño aos maiores que marchan ao instituto e que deixan unha pegada inesquecible en todas nós e nos seus compañeiros.

Ezequiel, Marta, Icía, Diego, Jandro, Igor, Samara e Irene:

Sabedes que o cole de Pazos é a vosa segunda casa e a Biblioteca Xoán Farias sempre terá a porta aberta para o que queirades.

Desexámosvos o mellor!

E para remataaaaarrrrrr... Só nos queda agradecer a quen estivo ao apoiando en todo momento a labor docente: familias e persoal non docente. Para vós o noso máis sinceiro agradecemento, porque sen a vosa disposición todo tería sido mooooooito máis complicado.

Grazas Xaime, Dolo, Aurora, Noemí, 

Gelis e Tamara, Patricia e Manoli.

Se queres ver máis fotos deste día, preme na Chispa enmascarada.

E ata aquí chegou o curso 2020/2021. Un ano intenso e inesquecible, no que fomos quen de reinventarnos e construir unha escola para todos e todas.

Gozade do verán, que o tedes merecido, do sol, da praia, da familia e dos amigos.

Cargade as baterías ao máximo para reencontrarnos en setembro cheos de enerxía.

E lede, lede moitísimo!!!

Aínda que xa sabes, que se non les non pasa nada;

pero se les, pasan moitas cousas.

Felices vacacións e ata o curso que vén!!!