Abellas na escola

Esta semana tivemos unha visita moi especial. Trátase dun auténtico enxame de abellas coa súa raíña á cabeza. Si, si... estades escoitando ben. Pero non viñeron soas; viñeron acompañadas de Nico, de Apípolis, que é un centro para a comprensión das relacións existentes entre os seres humanos e as abellas e que pretende amosar a importancia que estas teñen para nós e para o medio ambiente.

Tivemos dúas sesións dobles, para manter os grupos de convivencia estable. O mércores 9 foi a quenda dos pequesPazos e Rebuldeir@s e o xoves 10, a dos Tritóns e maiores. Podes ver as fotos de cada un dos días, premendo nestas imaxes.

A través dunha divertida historia teatralizada puidemos coñecer múltiples aspectos da vida das abellas: cómo son as colmeas, os favos, os tipos de abellas que forman as colonias, cáles son os apeiros que empregan os apicultores e apicultoras e os produtos que obtemos das abellas.

Grazas a unha colmea de observación puidemos velas en directo con total seguridade. Identificamos á raíña, os abázcaros e as obreiras e tamén vimos as celas coas larvas, o pole  e o néctar almacenado. 

Achegamos as nosas mans á colmea e sorprendeunos comprobar o quentiña que estaba, pois como moi ben nos dixo Nico, é moi importante manter quentiñas ás larvas para que se convirtan en futuras abellas.

Explicáronnos tamén cómo as abellas recolectan o pole e cómo hai que facer para que as abellas non o leven para dentro da colmea nas súas patiñas traseiras. E probámolo!!! Ten moitas propiedades xa que reforza o noso sistema inmunolóxico. 

Pero se queríamos probar o mel, tíñamos que traballar duramente, así que Nico fíxonos por en funcionamento a centrifugadora dos favos. E para iso era preciso a enerxía mecánica. Pois veña, a darlle!!!

Pois listo! Agora toca degustala. Rica, non... RI- QUÍ- SI- MA!!!

E case para rematar este interesantísimo obradoiro, tivemos a oportunidade de confeccionar a nosa candea con cera 100% natural. Que olor tan delicioso!!!

Agradecerlle á profe Kelly que foi quen argallou esta visita tan especial, grazas aos fondos do Contrato Programa Innova, EDU-sostibilidade, enmarcado dentro das accións da Axenda 2030, do PDI #espazODSparaaconcieciACCIÓN.